قازاقستاندىق 25 كىتاپ گەرمانيادا نەمىس تىلىنە اۋدارىلدى
بۇل ادەبيەتتەر «قازاق كىتاپحاناسى» اتتى جوبا اياسىندا ماينداعى فرانكفۋرت قالاسىندا كوپشىلىككە تانىستىرىلدى. نەمىس تىلىنە اۋدارىلعان العاشقى قازاقستاندىق كىتاپتاردىڭ قاتارىندا ەلباسىنىڭ «ەۋرازيا جۇرەگىندە» تۋىندىسى بار. وسى ارقىلى گەرمانيا جۇرتشىلىعى استانامىزدىڭ قالاي وركەندەپ، قالاي دامىعانى جايلى وقىپ ءبىلدى. كەيىننەن اۋەزوۆتىڭ «اباي جولى»، ءابىش كەكىلبايەۆتىڭ روماندارى مەن فاريزا وڭعارسىنوۆانىڭ ولەڭدەرى دە نەمىس تىلىندە جارىق كوردى.
«ادەبيەت پەن مادەنيەت - حالىقتاردى بايلانىستىراتىن كوپىر. سوندىقتان قازاقتىڭ ۇلى اقىنى ابايدان باستاپ دۇكەنباي دوسجانوۆ سەكىلدى قالامگەرلەرىمىزدىڭ تۋىندىلارىن نەمىس تىلىنە اۋدارۋ ەلىمىزدىڭ مادەنيەتىنە عانا ۇلەس قوسىپ قويماي، ەكىجاقتى قارىم- قاتىناستى دامىتۋعا دا ءوز سەپتىگىن تيگىزەدى. نەمىس ادەبيەتتانۋشىسى لەونارت كوشۋت قازاق كلاسسيكتەرىنىڭ تۋىندىلارىمەن جۇمىس ىستەۋ وڭايعا سوقپاعانىن جاسىرمايدى. ول العاش رەت اباي ولەڭدەرىن اۋدارعاننان كەيىن پوەزيا تۇڭعيىعىنا بويلاپ، ودان ارى قاراي توقتاي المايتىنىمدى ءتۇسىندىم دەيدى» پۋبليتسيست بيگەلدى عابدۋللين.
«قازاقتىڭ پوەتيكاسى، فيلوسوفيا، تاريحى مەن ءتىپتى ۇيقاسىنىڭ ءوزى جەكە دارا. مەن ىستەگەن جۇمىسىمنان ۇلكەن ءلاززات الدىم. كومەكشىم اباي تۋىندىلارىن اۋدارعانىمدى ەستىگەندە «اقىرى اباي نەمىسشە سويلەدى عوي» دەگەنى ءالى ەسىمدە»، دەگەن پىكرىمەن بولىسەدى ادەبيەتتانۋشى لەونارد كوشۋت.
ەندى نەمىس قاۋىمى تەك ابايدىڭ عانا ەمەس، ولجاس سۇلەيمەنوۆ پەن مۇقاعالي ماقاتايەۆتىڭ شىعارمالارىن دا وقي الادى. ال ادەبيەت سۇيەر قاۋىم «قازاق كىتاپحاناسى» جوباسىنىڭ جاڭا باسىلىمدارىن اسىعا كۇتەتىندەرىن ايتادى.
