ستارتاپتار بايگەسىندە قازاقستاندىق قوسىمشا 25 مىڭ دوللار جەڭىپ الدى

استانا. قازاقپارات - قازاقستاندىق «Wipon» اتتى موبيلدىك قوسىمشا ستارتاپتار بايگەسىندە 25 مىڭ دوللار جەڭىپ الدى.

بايقاۋ TechConnect Astana حالىقارالىق تەحنولوگيالىق كونفەرەنسياسى اياسىندا ءوتتى.

 بۇل دوداعا قاتىسقان 300 دەن استام ۇمىتكەردەن 10 فيناليست ىرىكتەلدى. 25 مىڭ دوللار كولەمىندەگى سىياقىنى Cross Border Angels حالىقارالىق ينۆەستورلار جۇيەسى ۇسىندى.

Wipon - جالعان تاۋارلاردى پايدالانۋدان ساقتايدى جانە قاۋىپسىزدىكتى قورعاۋعا سەپتىگىن تيگىزەتىن تۇعىرناما.

اتاپ ايتقاندا، iOS- قوسىمشاسى كومەگىمەن Wipon تۇتىنۋشىلارعا تاۋاردىڭ ءتۇپنۇسقالىلىعىن انىقتاۋعا مۇمكىندىك بەرەدى. موبيلدىك قوسىمشا ارقىلى تۇتىنۋشى تاۋاردىڭ قاپتاماسىنداعى شتريح- كودتى نەمەسە بىرەگەي كودتى سكانەرلەپ، ءونىمنىڭ ءتۇپنۇسقالىلىعىن انىقتاي الادى.

تۇعىرناما اۆتورلارى Wipon ەلىمىزدەگى كولەڭكەلى ەكونوميكامەن كۇرەسۋگە ەلەۋلى پايداسىن تيگىزەتىندىگىن العا تارتۋدا.

اۆتور: رۋسلان عابباسوۆ