ازاپتاۋلار جانە وكىلەتتىگىن اسىرا پايدالانۋ فاكتىلەرى بويىنشا 243 قىلمىستىڭ ءىس تىركەلدى – ءازىموۆا
بۇل تۋرالى ءماجىلىستىڭ جالپى وتىرىسىندا قازاقستانداعى ادام قۇقىقتارى جونىندەگى ۋاكىل ەلۆيرا ءازىموۆا ايتتى، دەپ حابارلايدى قازاقپارات ءتىلشىسى.
«مەنىڭ اتىما كەلىپ تۇسكەن ازاماتتاردىڭ 137 ءوتىنىشىنىڭ ىشىندە 86-سى ازاپتاۋ نەمەسە باسقا قاتىگەزدىك ارەكەتتەرگە بايلانىستى. رەسمي ستاتيستيكاعا سۇيەنسەك، 2022 -جىلى 13- ناۋرىزداعى ازاپتاۋلار جانە وكىلەتتىگىن اسىرا پايدالانۋ فاكتىلەرى بويىنشا 243 قىلمىستىق ءىس تىركەلدى. قازىرگى ۋاقىتتا ءبىز قۇقىق قورعاۋ ورگاندارىمەن ازاپتاۋلار ءۇشىن جاۋاپكەرشىلىكتى قاتاڭداتۋ جانە ولارعا جول بەرمەۋ تەتىكتەرىن ەنگىزۋ ماسەلەسىن تالقىلاۋدامىز. زاڭ بويىنشا ازاپتاۋدى زورلىق- زومبىلىقتى، قورقىتۋدى، سول سياقتى وزگە دە قاتىگەز قارىم- قاتىناستى قولدانىلىپ الىنعان دالەلدەمەلەر جارامسىز دەپ تانىلادى. وسىعان بايلانىستى ۇستاۋ مەن تەرگەۋدىڭ رۇقسات ەتىلمەگەن ادىستەرى تۋرالى ىستەردى تەرگەۋدى كەشىكتىرمەۋ وتە ماڭىزدى»، - دەدى ول قاڭتار وقيعالارىنا قاتىستى ماسەلەلەر كوتەرىلگەن وتىرىستا.
ونىڭ اتاپ وتۋىنشە، الداعى سوت پروتسەستەرىنىڭ اشىقتىعى جانە وعان تاۋەلسىز باقىلاۋشىلاردىڭ قاتىسۋى ماسەلەسى دە وزەكتى.
«بۇل ماسەلە بويىنشا مەن جوعارعى سوت ءتوراعاسىنا جانە باس پروكۋرورعا جۇگىندىم. سول قايعىلى وقيعالارعا بايلانىستى ادام ومىرىنە قاۋىپتىڭ جوعارى دەڭگەيى بولعانى انىق. جاپپاي تارتىپسىزدىك سالدارىنان مىڭنان استام ازامات ءتۇرلى دارەجەدە جاراقات الدى. ونىڭ ىشىندە مىڭنان استام ازامات پەن 3 مىڭنان استام قۇقىق قورعاۋ ورگاندارىنىڭ قىزمەتكەرى بار. 238 ادام مەرت بولدى»، - دەدى ەلۆيرا ءازىموۆا.
اۆتور: مارلان جيەمباي