ەسىمى بەلگىسىز كاسىپكەر 240 ناۋقاس بالاعا تەگىن مۇگەدەك ارباسىن سىيلادى
تەگىن سىيلىقتان الاياقتار دا پايدا كورمەك بولعان، دەپ جازادى muslim.kz.
«بالالارعا ارنالعان مۇگەدەك ارباسىن تاراتۋ جۇمىسى ماعان تاپسىرىلدى. 1 اي ىشىندە الماتى قالاسى مەن الماتى وبلىسىنىڭ اۋرۋحانالارىن، ەمدەۋ مەكەمەلەرىن ارالاپ مۇقتاج جاندارعا اربا تارتۋ ەتتىك. اتا- انالار مەن بالالاردىڭ قۋانعانىن كورسەڭىز، ءسوز جەتپەيدى. ءبىز باسىندا 240 دانانى رەسپۋبليكا بويىنشا تاراتامىز دەپ ويلاعام. شىن مانىسىندە، ناۋقاس بالالار ەلىمىزدە وتە كوپ ەكەنىنە ەندى كوزىم جەتتى. بارلىق اربا تەك الماتىدان ارتىلماي قالدى. بۇل ءىستى ءبىز جارناما ءۇشىن جاسامادىق. سوندىقتان دا كاسىپكەردىڭ اتىن اتاماي-اق قويايىن. ول - قاراپايىم قۇرىلىسشى»، - دەدى كاسىپكەردىڭ كومەكشىسى.
اربا تاراتۋشى ىزگى ءىستى جاساۋدا، الاياقتاردى كەزىكتىرگەنىن دە ايتتى.
«ماعان حابارلاسىپ، بىزدە اۋرۋ بالالار كوپ، 20-30 دانا اربا بەرەسىز بە دەپ سۇرادى. جارايدى، بەرەيىن، بالالاردىڭ ءتىزىمى مەن دياگنوزى جازىلعان مالىمەتتى كورسەتىڭىز دەسەم، ءۇن جوق، تەلەفونىن وشىرە سالدى. اۋرۋ بالانىڭ نەسىبەسىنەن دە پايدا كورگىسى كەلەتىن ازاماتتار جەتكىلىكتى ەكەن. ولار اربانى تەگىن الىپ، اقشاعا ساتپاق بولعانى انىق. ال مەن ناۋقاس جەتكىنشەكتى كوزىممەن كورىپ، اربانى تەك جاقىن تۋىسىنا عانا بەردىم» ، - دەيدى ول.
