موڭعوليادا 23- اقپاننان باستاپ كوروناۆيرۋسقا قارسى ۆاكسيناتسيا جۇرگىزىلەدى
بۇل تۋرالى بۇگىن باسپا ءسوز كونفەرەنسياسىندا موڭعوليا ەلىنىڭ دەنساۋلىق ساقتاۋ ءمينيسترى س. ەنحبولد مالىمدەدى، دەپ حابارلايدى قازاقپارات Montsame اقپارات اگەنتتىگىنە سىلتەمە جاساپ.
ۆەدومستۆو باسشىسىنىڭ ايتۋىنشا، 23 - اقپاننان باستاپ ەل ازاماتتارىن ۆاكسينالاۋ بويىنشا جوسپار قۇرىلدى.
«قازىرگى كەزدە ءبىز ۆاكسينانىڭ ءتورت ءتۇرىن يمپورتتاۋ تۋرالى كەلىسسوزدەر جۇرگىزۋدەمىز. ءبىرىنشى كەزەكتە موڭعوليا Pfizer جانە AstraZeneca ۆاكسينالارىن الادى»، - دەدى س. ەنحبولد.
ول سونداي- اق -70 گرادۋس تەمپەراتۋرادا ساقتالۋى ءتيىس Pfizer ۆاكسيناسىنا ارنالعان قويما جانە جابدىقتاردىڭ تولىق دايىن ەكەنىن قوسىپ ءوتتى.
«ەل تۇرعىندارىنىڭ 20 پايىزىنا ۆاكسينا Covax باعدارلاماسىنىڭ قارجىلاندىرۋ ەسەبىنەن ەگىلەدى، ۆاكسينالاۋعا تۇرعىنداردىڭ جالپى العاندا 60 پايىزى تارتىلادى. ەل حالقىنىڭ قالعان بولىگىن ۆاكسينالاۋ قارجىلاندىرۋدىڭ باسقا كوزدەرىنەن جۇرگىزىلەدى. بۇل ماسەلە قارجى مينيسترلىگى تاراپىنان تولىق شەشىلىپ، ماقۇلدانعان»، - دەدى مينيستر.
اۆتور: زارينا تۋعانبايەۆا