ەسەپ: ساياسي تۇتقىندار سانى 230 دان استى
بۇل تۋرالى امەريكالىق Perseus Stategies زاڭ كومپانياسىنىڭ 29- ساۋىردە جاريالاعان ەسەبىندە ايتىلادى. قۇجاتتى دايىنداۋ قاتارىندا «مەموريال» جانە بىرنەشە قۇقىق قورعاۋ ۇيىمى قاتىسقان.
ەسەپتە وپپوزيتسيالىق ساياساتكەرلەر مەن ازاماتتىق بەلسەندىلەردىڭ، ءدىني جانە ۇلتتىق ازشىلىقتاردىڭ، ل گ ب ت بەلسەندىلەر مەن ۋكراينا ازاماتتارىنىڭ، ۋكرايناشىل بەلسەندىلەردىڭ قۋدالاناتىنى ايتىلادى. ۇيىم «كرەمل ءوز ارەكەتىنىڭ جازاسىز قالماسىن ءبىلۋى ءۇشىن» رەسەيدەگى قۋدالاۋعا جاۋاپتى ازاماتتارعا جان-جاقتى سانكتسيا قويۋعا شاقىرادى.
بايانداما اۆتورلارى بەيبىت جيىن وتكىزگەندەردى قىلمىستىق نە اكىمشىلىك جاۋاپقا تارتاتىن 2012-جىلى قابىلدانعان «رەپرەسسيالىق زاڭ» تۋرالى ءجيى ايتادى. «ءدىندارلار سەزىمىن قورلاۋ»، جاستار اراسىندا «گوموسەكسۋاليزمدى ۇگىتتەۋ»، سەپاراتيزمگە شاقىرۋ، «ەكىنشى دۇنيەجۇزىلىك سوعىستاعى س س س ر ءرولىن مانسۇقتاۋ» سياقتى ايىپتار دا قۋدالاۋ قۇرالدارى رەتىندە كورسەتىلەدى.
ساياسي تۇتقىن رەتىندە يۋكوس كومپانياسىنىڭ بۇرىنعى قىزمەتكەرى، ءومىر بويىنا تۇرمەگە جابىلعان الەيسەي پيچۋگين، ۋكراينالىق رەجيسسەر ولەگ سەنتسوۆ پەن «وتكرىتايا روسسيا» بەلسەندىسى اناستاسيا شيەۆچەنكو اتالادى.
ەسەپ اۆتورلارىنىڭ پايىمداۋىنشا، رەسەيدە ساياسي سەبەپپەن - 54، ءدىني موتيۆپەن 182 ادام قۋدالانادى. ءدىني سەبەپپەن قۋدالاناتىندار كوبىنە رەسەيدە تىيىم سالىنعان «حيزب ۋت-تاحرير» مەن «يەگوۆا كۋاگەرلەرى» ۇيىمدارىنىڭ مۇشەلەرى.