22 جىلدان بەرى ءيت جاتتىقتىرىپ جۇرگەن وفيتسەر ايەلدى بىلەسىز بە
حالىقارالىق ايەلدەر كۇنى قارساڭىندا قازاقپارات ءتىلشىسى ق ر ءىىم كينولوگيا ورتالىعىنىڭ باستىعى، پوليتسيا پودپولكوۆنيگى انەل بولعىمبايەۆامەن اڭگىمەلەسكەن ەدى.
انەل بولعىمبايەۆا ءومىرى مەن قىزمەتىن كينولوگيا سالاسىنا ارناعان. ايتۋىنشا، ءيت اسىراپ، ولارعا كۇتىم جاساپ، جاتتىقتىرۋ - بالا كۇننەن بەرگى سۇيىكتى ءىسى.
«حالقىمىزدا «ءيت - جەتى قازىنانىڭ ءبىرى» دەپ بەكەر ايتىلماعان. مەن بالا كەزىمنەن بۇل جانۋارلاردى اسىراپ، ولارعا قامقورلىق كورسەتكەندى جاقسى كوردىم. ءتىپتى، جاي عانا كوزقاراسىنان ولارعا نە قاجەت ەكەنىن، كوڭىل- كۇيى قانداي ەكەنىن جاقسى ءتۇسىنىپ قويامىن. سوندىقتان بولار، بولاشاعىمدى كينولوگيا سالاسىمەن بايلانىستىرعىم كەلدى»، - دەيدى كەيىپكەرىمىز.
بۇگىندە پودپولكوۆنيك انەل بولعىمبايەۆانىڭ كينولوگيا سالاسىنداعى ەڭبەك ءوتىلى 22 جىل بولعان. العاشقى قىزمەتىن ول شىعىس قازاقستان وبلىسىندا كىشى سەرجانت شەنىندە «كىشى ينسپەكتور- كينولوگ» بولىپ باستاعان.
«2018 -جىلى ماعان الماتى قالالىق پوليتسيا دەپارتامەنتىنىڭ كينولوگيالىق قىزمەت ورتالىعىن باسقارۋعا شاقىرۋ ءتۇستى. كەيىن الماتىدا ق ر ءى ءى م كينولوگيالىق ورتالىعىنىڭ باستىعى بولىپ تاعايىندالدىم»، - دەدى ول. كەيىپكەرىمىز قىزمەتىندە بىلىكتى باسشى بولا بىلسە، وتباسىندا سۇيىكتى دە مەيىرىمدى انا. ونىڭ ەكى قىزى بار.
«ەكى قىزىم ءوزىم سەكىلدى جانۋارلاردى وتە جاقسى كورەدى. بۇل - جاقسى قاسيەت. سەبەبى، سول ارقىلى ولاردىڭ اينالاسىنا دەگەن قامقورلىق، جاۋاپكەرشىلىك جانە ماحابباتى قالىپتاسادى»، - دەدى ول.
انەل بولعىمبايەۆا - ءوز قىزمەتىنە ادال ادام. ءتىپتى، ايەلدەر مەرەكەسى قارساڭىندا دا ۇيدە جاتپاي، قىزمەتىندە ءجۇر. سەبەبى، ءوزىنىڭ ايتۋىنشا، ءبىر دە ءبىر كۇنىن جۇمىستاعى جانۋارلاردى كورمەي وتكىزە المايدى.
«بارلىق قىز- كەلىنشەكتەردى، انالاردى حالىقارالىق ايەلدەر كۇنىمەن قۇتتىقتايمىن. ولارعا ەڭ باستىسى دەنساۋلىق، ايەل باقىتىن، سۇيىكتى جار، انا جانە باقىتتى بولۋىن تىلەيمىن»، - دەپ ءوزىنىڭ اق تىلەگىن جەتكىزدى ق ر ءى ءى م كينولوگيا ورتالىعىنىڭ باستىعى، پوليسيا پودپولكوۆنيگى انەل بولعىمبايەۆا.