جەتى بالاسىنان كوز جازىپ قالعان انا وتباسىمەن 22 جىلدان كەيىن قاۋىشتى - فوتو

None
None
استانا. قازاقپارات - 1 -ناۋرىز - العىس ايتۋ كۇنى قارساڭىندا ەلوردادا قازاق راديوسىنىڭ «مىڭ العىس» قايىرىمدىلىق كونسەرتى ءوتتى، دەپ حابارلايدى قازاقپارات ءتىلشىسى.

كونسەرتكە «بارمىسىڭ، باۋىرىم؟!»، «اق وتاۋ»، «جان جىلۋى» راديوباعدارلامالارىنىڭ كەيىپكەرى بولعان ءتۇرلى تاعدىر يەلەرى قاتىستى. ولاردىڭ ءبىرى «جان جىلۋى» باعدارلاماسىنىڭ ارقاسىندا 14 جىلدان كەيىن جارىق الەمدى كورگەن قىزىلوردالىق ءدۇردانا حابيبوللا ەدى.

null

ءومىر بويى اناسىنىڭ بەينەسىن كورۋدى ارمانداعان ءدۇردانا وتكەن جىلدىڭ ماۋسىم ايىندا «جان جىلۋى» راديوباعدارلاماسىنا قاتىسقان. ءدۇردانانىڭ ەمىنە دەپ راديوتىڭدارماندار ءبىر تاۋلىكتە 500 مىڭ تەڭگە جيناپ بەرگەن، تاعى ءبىر بەلگىسىز ازامات ەسەپشوتىنا ميلليون تەڭگە اۋدارعان. وسىلايشا، ءبىر اپتادا ەمگە قاجەتتى 2 ميلليون تەڭگە جينالىپ، ءدۇردانا وتا جاساتۋ ءۇشىن ماسكەۋگە اتتانعان.

 null

بۇگىنگى كونسەرتكە ءدۇردانا ارنايى كەلدى جانە ءانشى گۇلنۇر ورازىمبەتوۆامەن «قازاقستان» كونسەرت زالىنىڭ ساحناسىندا ءان شىرقادى. گۇلنۇر ورازىمبەتوۆا ءدۇرداناعا ساتتىلىك تىلەپ، بولاشاقتا ءدۇردانانىڭ بارلىق ساحنالىق كويلەكتەرىن ءوزى اپەرەتىنىن جەتكىزدى.

 null

«جان جىلۋى» تىڭدارماندارىنىڭ كومەگىن كورگەن ناۋقاستاردىڭ ءبىرى - جۇلىن قاتەرلى ىسىگىمەن اۋىرعان ماليكا ەدى. ونىڭ وتاسىنا قاجەتتى اقشانى راديوتىڭدارماندار ەكى اپتادا جيناپ بەرگەن جانە يزرايلدە وتا ءساتتى جاسالىپ، وجەت قىز قاتەرلى ىسىكتى جەڭدى. كونسەرتكە كەلگەن ماليكانىڭ اناسى زاۋرەش بارلىق راديوتىڭدارماندارعا العىسىن ءبىلدىردى.

 null

قىزىلوردالىق نازەركە قادىروۆا دا «جان جىلۋى» باعدارلاماسىنىڭ العاشقى كەيىپكەرلەرىنىڭ ءبىرى بولدى. نازەركە كۇيەۋىمەن، 7 بالاسىمەن جانە مۇگەدەك اعاسىمەن 1 بولمەلى پاتەردى پانالاپ كەلگەن. ونىڭ ءتورت ناۋقاس بالاسى دارىگەر قاراۋىندا. راديوباعدارلاما ارقىلى نازەركەنىڭ جاي- كۇيىن ەستىگەن قىزىلوردالىق كاسىپكەر، قۇرىلىس كومپانياسىنىڭ باسشىسى تەمىرحان ءالىمقۇلوۆ كوپبالالى جانۇياعا ءۇش بولمەلى پاتەردى سىيعا تارتقان.

جۇرگىزۋشى اقبايان ساپاربايەۆانىڭ ايتۋىنشا، «جان جىلۋى» باعدارلاماسى وسى كۇنگە دەيىن ءوز كەيىپكەرلەرىنە 33 ميلليون تەڭگە كولەمىندە ماتەريالدىق كومەك كورسەتكەن. كومەك كورسەتۋشىلەردىڭ دەنى - قاراپايىم ازاماتتار جانە زەينەتكەر اتا- اجەلەر.

 null

قازاق راديوسىنىڭ تاعى ءبىر الەۋمەتتىك جوباسى - «بارمىسىڭ، باۋىرىم» راديوباعدارلاماسى. ونىڭ جۇرگىزۋشىسى قىمبات دوسجان جىلىنا 4 جارىم مىڭ ادامنىڭ جوعالاتىنىن، ونىڭ 20 پايىزىنىڭ ءىز- ءتۇزسىز كەتەتىنىن ايتتى. «بارمىسىڭ باۋىرىم» راديوباعدارلاماسى ارقىلى 353 ادامعا ىزدەۋ سالىنىپ، 32 سى تابىلعان.

null

بۇگىنگى كونسەرتتە الماتى وبلىسى، سۋىقساي اۋىلىنان كەلگەن رايسا لەسكوۆسكايانىڭ وقيعاسى كورەرمەندەردىڭ كوڭىلىن تولقىتتى. رايسا نيكولايەۆنا - وسىدان 22 جىل بۇرىن 7 ۇل-قىزىنان كوز جازىپ قالعان قىرعىزستان ازاماتشاسى. 90-جىلدارى اۋىر تۇرمىستان قاجىعان انا قازاقستانداعى ءومىردى كورىپ كەلەيىن دەپ شەكارادان وتكەن جانە قۇجاتتارىن جوعالتىپ، قازاقستاندا قالىپ قويعان.

وسىلايشا، اق جاۋلىقتى انا «مىڭ العىس» قايىرىمدىلىق كونسەرتىنىڭ ساحناسىندا ءوز ۇلى اناتولييمەن 22 جىلدان كەيىن قاۋىشتى. سونداي-اق، كونسەرت بارىسىندا قازاقستانداعى قىرعىزستان ەلشىلىگىنىڭ كونسۋلى المازبەك كۋانىشبەك ۇلى رايسا نيكولايەۆناعا جەكە كۋالىگىن راستايتىن قۇجاتتى سالتاناتتى تۇردە تابىس ەتتى.

 null

قازاق راديوسىنىڭ «اق وتاۋ» راديوباعدارلاماسىنىڭ كەيىپكەرلەرى بولعان مارعۇلان مەن گۇلجازيرا دا بۇگىنگى «مىڭ العىس» كونسەرتىنىڭ قۇرمەتتى قوناقتارى اتاندى. ءبىر جىل بۇرىن گۇلجازيرانىڭ ومىرتقاسى سىنىپ، التى اي بويى اۋرۋحانا توسەگىنە تاڭىلعان. ايتسە دە، جاس وتباسى بارلىق قيىندىقتاردى ەڭسەرىپ، بارشا قازاقستانعا ۇلگى بولعان.

null 

باعدارلاما جۇرگىزۋشىسى ءنازيرا بەردالىنىڭ ايتۋىنشا، قازاقستاندا جىلىنا 50 مىڭ شاڭىراق شايقالادى. ءبىر جىلدا 700 مىڭ جۇپ وتباسىن قۇرسا، ونىڭ 300 مىڭى اجىراسىپ ۇلگەرەدى. «اق وتاۋ» وتباسىلىق راديوباعدارلاماسى بۇل كورسەتكىشتى ازايتۋعا سەپتىگىن تيگىزىپ كەلەدى.

سونداي-اق، «مىڭ العىس» قايىرىمدىلىق كونسەرتىنە ءبىر كۇندە 11 بالانى اسىراپ العان اقمولا وبلىسى قوشقارباي اۋىلىنىڭ تۇرعىندارى كەلدى. جۇمىسسىز جاستار قالاعا اعىلعاندا، جەرگىلىكتى بيلىك اۋىل مەكتەبىن جابۋدى ۇيعارعان. اۋىلىنىڭ كۇيرەگەنىن قالاماعان قايىركەن اۋىلداستارىن اتا- انا قامقورلىعىنسىز قالعان جەتىم بالالاردى اسىراپ الۋعا ۇگىتتەگەن. اتا-انا قامقورلىعىنسىز قالعان بالالاردى ءوز قامقورلىعىنا العان قوشقارباي اۋىلىنىڭ بۇل ءىسى كوپشىلىككە ۇلگى بولدى.



«مىڭ العىس!» قايىرىمدىلىق كەشىندە كومەك جاشىكتەرى قويىلدى. وعان جينالعان قاراجات ءتۋابىتتى سۋقاراڭعىلىق دياگنوزى قويىلعان 1 جاسار ارماننىڭ ەمىنە جۇمسالماق. ارماننىڭ ءبىر كوزىنە وتا جاساۋ ءۇشىن ەكى ميلليون تەڭگەگە جۋىق قاراجات كەرەك. تاعى ءبىر اتاپ وتەرلىگى، زالدا وتىرعان كاسىپكەر بولاتبەك جولان ۇلى ارماننىڭ جانە اتا-اناسىنىڭ سانكت-پەتەربۋرگكە بارىپ كەلۋ جولاقىسىن ءوز موينىنا الدى.

 null

ايتا كەتەيىك، قازاقستان حالقى 2016 -جىلى تۇڭعىش رەت العىس ايتۋ كۇنىن اتاپ ءوتتى. 2016 -جىلعى 14 -قاڭتاردا پرەزيدەنت ن. ءا. نازاربايەۆ قازاقستان حالقى اسسامبلەياسىنىڭ قۇرىلعان كۇنى - 1 -ناۋرىزدى ەلىمىزدە العىس ايتۋ كۇنى دەپ جاريالاعان ەدى. بۇل كۇن - تاعدىر توعىستىرعان قازاقستاننىڭ كوپەتنوستى حالقىنىڭ ورتاق تاريحىن قۇرمەتتەۋ جانە قايىرىمدىلىق داستۇرلەرىن، الەۋمەتتىك ىنتىماقتى جانە ءوزارا كومەك كورسەتۋدى قولداۋ كۇنى بولماق.

null null null 

سوڭعى جاڭالىقتار