قازاقستاندا 22 سۋ قويماسى سالىنادى

تاراز. قازاقپارات - قازاقستاندا سۋ جەتىسپەۋشىلىگى ماسەلەسى جاڭا سۋ قويمالارىنىڭ ەسەبىنەن شەشىلمەك.

بۇل تۋرالى تارازدا جامبىل، الماتى، وڭتۇستىك قازاقستان وبلىستارى وكىلدەرىنىڭ قاتىسۋىمەن وتكەن ءوڭىرارالىق كەڭەستە ايتىلدى، دەپ حابارلايدى «قازاقپارات» ح ا ا.

ەلىمىزدىڭ 7 وبلىسىندا 22 سۋ قويماسىن سالۋ جوسپارلانىپ وتىر. ولار: الماتى، شىعىس قازاقستان، جامبىل، باتىس قازاقستان،  قىزىلوردا، ماڭىعستاۋ جانە وڭتۇستىك قازاقستان وبلىستارى.

قۇرىلىس جۇمىستارى 2021-جىلى اياقتالۋى ءتيىس. جاڭا سۋ قويمالارى 1,9 تەكشە مەتر اعىن سۋدى توسىپ الۋعا مۇمكىندىك بەرەدى. 22 سۋ قويماسىنىڭ جالپى قۇنى 57,2 ميلليارد تەڭگەنى قۇرايدى.

ءماجىلىس بارىسىندا وسى ۋاقىتتا اتالعان ماسەلە بويىنشا ينۆەستيتسيالىق ۇسىنىس ءتۇسىپ، ول ءتيىستى ورگاندار تاراپىنان ماقۇلدانعان سوڭ قارجى مينيسترلىگىنە تەحنيكا-ەكونوميكالىق نەگىزدەمەلەرى مەن جوبالاۋ-سمەتالىق قۇجاتتارىن دايىنداۋعا جىبەرىلەتىندىگى ايتىلدى.

سونىمەن قاتار، 2017-2021-جىلداردى قامتيتىن اگروونەركاسىپ كەشەنىن دامىتۋ مەملەكەتتىك باعدارلاماسى بويىنشا، گيدروتەحنيكالىق قۇرىلعىلاردىڭ تيىمدىلىگىن ارتتىرۋ مەن ونىڭ جۇمىسقا قابىلەتتىلىگىن ساقتاۋ بويىنشا ءىس-شارالار قاراستىرىلعان.

2018-جىلدان باستاپ، 26 اپاتتى جاعدايداعى سۋ قويمالارىن قايتا جوندەۋ جۇمىستارى جوسپارلانىپ وتىر.

ءوز كەزەگىندە بۇل شارا سۋ شارۋاشىلىعى قۇرىلعىلارىن پايدالانۋدا قاۋىپسىزدىكتى قامتاماسىز ەتىپ، 148 گەكتار ايماقتاعى جەردىڭ سۋارمالىلىعىن ارتتىرادى.