نازاربايەۆتىڭ «الەم. 21- عاسىر» مانيفەسى ادامزاتتى ءۇشىنشى دۇنيەجۇزىلىك سوعىس قاتەرىنەن ارىلتۋعا باعىتتالعان
«ەگەمەندىگىمىزدىڭ ەلەڭ- الاڭىندا، تاۋەلسىزدىگىمىزدىڭ ءتاڭسارى شاعىندا ەلىمىزدىڭ بولاشاعى تۋرالى پەسسيميستىك بولجامدار كوپ ايتىلدى. سونىڭ ىشىندە بۇلار كوپ ۇلتتى، كوپ ءتىلدى، كوپ ءدىندى ەل، باسى قوسىلمايدى، ىرىڭ-جىرىڭى شىعادى دەگەندەر دە بولدى. ءبىراق، ولاردىڭ ايتقانى كەلگەن جوق. قازاقستان حالقىنىڭ، ەلباسىنىڭ ايتقانى كەلدى. ءبىز ەڭ الدىمەن ءوز الدىمىزعا ءۇي بولدىق. ەلوردامىز، قازاقستان جاھاندىق جيىندار وتەتىن ورىنعا اينالدى»، - دەپ اتاپ ءوتتى دەپۋتات.
سونىمەن قاتار ول قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىق ەتكەنىن، جاقىندا ب ۇ ۇ قاۋىپسىزدىك كەڭەسىنىڭ 2017-2018 -جىلدارداعى تۇراقتى ەمەس مۇشەلىگىنە سايلانعانىن اتاپ ءوتتى.
«ءسويتىپ، ءوزىمىز دە الەم تاعدىرىنا ارالاسا الاتىن ەلگە اينالدىق. سونداي ۇلكەن قۇقىق الدىق. مۇنىڭ جارقىن كورىنىسى - پرەزيدەنتى نۇرسۇلتان نازاربايەۆتىڭ «الەم. 21- عاسىر» اتتى مانيفەسى. ول بىرىككەن ۇلتتار ۇيىمىنىڭ رەسمي قۇجاتى رەتىندە قابىلدانىپ، بۇكىل الەمنىڭ نازارىن اۋدارىپ وتىر»، - دەدى ول.
ابدراحمانوۆ بۇگىنگى كونفەرەنسيادا دا وسى ماسەلە كەڭىنەن تالقىلاناتىندىعىن باسا ايتتى.
«ويتكەنى، ورتالىق ازيانى يادرولىق قارۋدان ادا ەتۋ جونىندەگى ەلىمىزدىڭ ۇسىنىسى بارلىق تاراپتان قولداۋ تاۋىپ وتىر. ەلباسىمىزدىڭ مانيفەسىندەگى ويلاردى جۇزەگە اسىرۋ الەمدەگى قارۋسىزدانۋدىڭ كوشباسشىسى رەتىندە تانىلعان مەملەكەتىمىزدىڭ وسى ىستەگى باستامالارىن ادامزاتتى ءۇشىنشى دۇنيەجۇزىلىك سوعىس قاتەرىنەن ارىلتۋ ءۇشىن دۇنيەجۇزى قولعا الاتىن شارالار توڭىرەگىنە ۇيىستىراتىن بولادى»، - دەدى ءماجىلىس دەپۋتاتى.
ايتا كەتەيىك، ەلورداداعى ۇلتتىق كىتاپحانادا ق ر تاۋەلسىزدىگىڭ 25 جىلدىعىنا ارنالعان «نۇرسۇلتان نازاربايەۆتىڭ «الەم. 21- عاسىر» مانيفەسى: ورتالىق ازياداعى وڭىرلىك بىرەگەيلىك پەن قاۋىپسىزدىك» اتتى ورتالىق ازيالىق حالىقارالىق عىلىمي- ساراپشىلىق كەڭەستىڭ وتىرىسى وتۋدە. وعان قازاقستان حالقى اسسامبلەياسىنىڭ مۇشەلەرى، ق ر پارلامەنتى ءماجىلىسىنىڭ دەپۋتاتتارى، وتاندىق جانە قىرعىزستان، وزبەكستان، تاجىكستان، ءۇندىستان، پاكىستان، وڭتۇستىك كورەيا ەلدەرىنىڭ ساراپشىلارى قاتىسۋدا.
اۆتور: مارلان جيەمباي
