قازاقستاننىڭ باتىس وڭىرىندە راديكالدى توپتىڭ 21 مۇشەسى قۇرىقتالدى - ۇ ق ك

استانا. قازاقپارات - ۇلتتىق قاۋىپسىزدىك كوميتەتى 12-30- تامىز ارالىعىندا اقتوبە جانە باتىس قازاقستان وبلىستارى اۋماعىندا ءۇش راديكالدى توپتىڭ ءىس-ارەكەتتەرىنە توسقاۋىل قويعانىن حابارلادى.

ق ر ۇ ق ك ءمالىم ەتۋىنشە، ولار راديكالداردىڭ قۇقىق قورعاۋ قىزمەتكەرلەرىنە شابۋىل جاساۋدى، سونداي-اق حالىق كوپ شوعىرلاناتىن ورىنداردا تەرروريزم اكتىلەرىن ۇيىمداستىرۋدى جوسپارلاعان.

«توپ مۇشەلەرىنىڭ تۇرعىلىقتى مەكەنجايلارىن ءتىنتۋ بارىسىندا بىرنەشە اتىس قارۋى جانە وعان قاجەتتى وق-دارىلەر، تروتيل، قولدان جاسالعان جارىلعىش زات، سۋىق قارۋ، ەكسترەميستىك مازمۇنداعى باسپا جانە اۋديو ماتەريالدار، حالىقارالىق تەرروريستىك ۇيىمداردىڭ تولبەلگىلەرى الىندى.

بۇعان قوسا، توپ مۇشەلەرىنىڭ بىرىنەن ءوز ءىس-ارەكەتتەرىن قارجىلاندىرۋ ماقساتىندا تەڭگەلىك جالعان اقشالار، ارنايى قاعاز، كومپيۋتەرلىك جانە كوبەيتۋ تەحنيكاسى تابىلدى»، - دەپ جازادى كوميتەت.

كورسەتىلگەن توپ مۇشەلەرىنە قاتىستى ق ر قىلمىستىق كودەكسىنىڭ 174 («الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە دىني الاۋىزدىقتى قوزدىرۋ»)، 256 («تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ»)، 257 («تەرروريستىك توپ قۇرۋ جانە ونىڭ قىزمەتىنە قاتىسۋ»)، 231 («جالعان اقشا نەمەسە باعالى قاعازدار جاساۋ، ساقتاۋ، الىپ ءوتۋ نەمەسە وتكىزۋ»)، 287 («قارۋدى، وق-دارىلەردى، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ»)، 288 («قارۋدى زاڭسىز جاساۋ») باپتارى بويىنشا سوتقا دەيىنگى تەرگەۋ شارالارى جۇرگىزىلۋدە.

سوت سانكتسياسىنا سايكەس باتىس قازاقستان وبلىسىنىڭ 10 تۇرعىنى جانە اقتوبە وبلىسىنىڭ 11 تۇرعىنى قاماۋعا الىندى. تەرگەۋ امالدارى جالعاسۋدا.

اۆتور: جاسۇلان جولدىبايەۆ