استانادا 21 مىڭنان استام جاسوسپىرىمگە ۆاكسينا سالۋ ماسەلەسى وزەكتى بولىپ وتىر
استانا قالاسى اكىمىنىڭ ورىنباسارى ەرمەك امانشايەۆتىڭ جەتەكشىلىگىمەن استانا قالاسى اكىمدىگىنىڭ جانىنداعى جۇقپالى اۋرۋلاردى تومەندەتۋ بويىنشا شتاب وتىرىسى ءوتتى. جيىن بارىسىندا 15-19 جاس اراسىنداعى تۇلعالارعا قىزىلشاعا قارسى قوسىمشا يممۋنداۋ جۇرگىزۋ ماسەلەسى قاراستىرىلدى، دەپ حابارلادى قالالىق اكىمدىكتىڭ باسپا ءسوز قىزمەتىنەن.
اتالعان كامپانيانى وتكىزۋ ءۇشىن ساپالى جاعدايلار جاساۋ، يممۋنداۋ مەرزىمى، ەكپە قابىلداعاننان كەيىن مىندەتتى مەديتسينالىق باقىلاۋ جۇرگىزۋ، اقپاراتتىق- تۇسىندىرمە جۇمىستارىن جۇرگىزۋ بويىنشا ماسەلەلەر قاراستىرىلدى.
قازىرگى ۋاقىتتا 21580 بالاعا ۆاكسينا سالۋ ماسەلەسى وزەكتى بولىپ وتىر. وسىعان وراي، قالانىڭ 10 ەمحانالارىندا جانە 7 العاشقى مەديتسينالىق- سانيتاريالىق كومەك ۇيىمدارىندا، سونداي-اق 110 ءبىلىم بەرۋ ۇيىمدارىندا 127 ەكپە سالۋ بولمەلەرى مەن يممۋنداۋ جۇرگىزۋ ءۇشىن 142 -جىلجىمالى بريگادالار قۇرىلعان.
