ينتەرنەت ساپاسىن جەتىلدىرە الساق، دامىعان 20 مەملەكەتتىڭ قاتارىنان كورىنە الامىز - مينيستر
بۇل تۋرالى بۇگىنى ءوزىنىڭ Facebook پاراقشاسىندا ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين جازدى، دەپ حابارلايدى قازاقپارات.
«كەشە «استانا» حالىقارالىق قارجى ورتالىعىندا ەلىمىزدەگى ەلەكتروندى ۇكىمەت سالاسىن دامىتۋ جايىن تالقىلادىق. ءىس-شاراعا ب ۇ ۇ- نىڭ سيفرلاندىرۋ سالاسىنا جاۋاپتى دەپارتامەنتىنىڭ باسشىسى ۆينچەنتسو اكۋارو مىرزا ارنايى كەلىپ، ەلىمىزدەگى سيفرلاندىرۋ سالاسىنداعى اتقارىلىپ جاتقان جۇمىستارعا ءوز باعاسىن بەردى.
بيىل ەلىمىز ب ۇ ۇ رەيتينگىندە ەلەكتروندىق ۇكىمەتتى دامىتۋ بويىنشا 28-ورىندى يەلەنگەن بولاتىن. ال، وسى رەيتينگتىڭ ىشىندە «ونلاين-قىزمەتتەردىڭ ساپا يندەكسى» بويىنشا 8-ورىندامىز! ب ۇ ۇ وكىلى قازاقستان ەلەكتروندى ۇكىمەتتى دامىتۋدا كوشباسشى ەلدەردىڭ ءبىرى ەكەنىن ايتا كەلە، رەيتينگتە ەلىمىز جوعارى بالل يەلەنگەنىن اتاپ ءوتتى»، - دەپ جازدى مينيستر.
وسى رەتتە ول تەلەكوممۋنيكاتسيا سالاسى بويىنشا ينتەرنەت ساپاسىن، ياعني تالشىقتى وپتيكالى جەلىلەردى جەتىلدىرىپ، الداعى 2 جىلدا وسى باعىتتا ناتيجەلى جوبالار ىسكە اسسا، الەمنىڭ دامىعان 20 مەملەكەتىنىڭ قاتارىنان كورىنۋگە بولاتىنىن جەتكىزدى.
«ب ۇ ۇ باعالاۋى - ەلەكتروندى ۇكىمەتتىڭ دامۋ يندەكسى بويىنشا جۇرگىزىلەتىن ەڭ بەدەلدى رەيتينگ ەكەندىگىن اتاپ وتكىم كەلەدى. ونى قالىپتاستىرۋ اياسىندا ب ۇ ۇ ساراپشىلارى ەلەكتروندىق قىزمەتتەر مەن ادامي كاپيتالدىڭ دامۋىنا باسا ءمان بەرەدى. باعالاۋدان سوڭ، تاۋەلسىز ساراپشىلار دەربەس شەشىم قابىلدايدى. رەيتينگ شەڭبەرىندە ب ۇ ۇ-عا قاتىسۋشى 193 ەل باعالانادى»، - دەيدى باعدات مۋسين.
