نازاربايەۆ بەينەلەنگەن 20 مىڭدىق بانكنوتتار اينالىمدا قالا ما؟
نۇرسۇلتان نازاربايەۆتىڭ پورترەتى بار نومينالى 20000 تەڭگەلىك مەرەيتويلىق بانكنوت 2021-جىلعى 1- جەلتوقساندا شەكتەۋلى تارالىممەن اينالىمعا شىعارىلعان، ول ەسكەرتكىش بانكنوت سانالادى. ۇلتتىق بانك دەرەكتەرى بويىنشا، ۇ ب شىعارعان كۋپيۋرالاردىڭ قولما-قول اقشا اينالىمىنداعى ۇلەسى اينالىمداعى (ادەتتەگى) بانكنوتتارمەن سالىستىرعاندا (اينالىمداعى بانكنوتتاردىڭ ءبىر پايىزىنان كەم) از.
«مەرەيتويلىق جانە ەسكەرتكىش بانكنوتتاردىڭ اينالىم مەرزىمى بەلگىلەنبەيدى. بۇل بانكنوتتار زاڭدى تولەم قۇرالى جانە ولاردىڭ تابيعي تۇردە ەسكىرۋىنە قاراي اقشا اينالىمىنان الىنادى. وسىعان بايلانىستى قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان نومينالى 20000 تەڭگەلىك مەرەيتويلىق بانكنوتتاردى اينالىمنان الۋ جوسپارلانىپ وتىرعان جوق. ولار بارلىق باسقا ەستەلىك بانكنوت سياقتى تولەمدەردىڭ، بانك وپەراتسيالارىنىڭ جانە اۋدارىمداردىڭ بارلىق ءتۇرى بويىنشا قابىلدانادى»، - دەپ مالىمدەدى ۇلتتىق بانك وكىلدەرى.
ۇلتتىق بانك وكىلدەرى «20 مىڭ تەڭگەلىك بانكنوتتىڭ جاڭا ۇلگىسى ازىرلەنە مە» دەگەن سۇراققا پىكىر ءبىلدىردى.
«ۇلتتىق بانك ۇلتتىق ۆاليۋتانىڭ جالعىز ەميتەنتى بولا وتىرىپ، بانكنوتتار مەن مونەتالار نومينالدارىنىڭ قۇرىلىمىن ايقىندايدى، سونداي-اق، اينالىستاعى بانكنوتتاردىڭ ءتيىستى ساپاسىن قامتاماسىز ەتەدى. جاڭا تەحنولوگيالار دامىعان سايىن پوپۋلياتسيانى اجىراتۋ قيىن بولاتىن جالعان اقشا بەلگىلەرىنىڭ پايدا بولۋ ىقتيمالدىعى ارتادى.
وسىعان بايلانىستى ۇلتتىق بانك ۇلتتىق ۆاليۋتانىڭ اقشا بەلگىلەرىنىڭ قورعانىش قاسيەتتەرىن كۇشەيتۋ بويىنشا تۇراقتى جۇمىس جۇرگىزەدى جانە قولدان جاساۋدان بارىنشا قورعالعان بانكنوتتاردى شىعارادى. شىعارۋعا بەكىتىلگەن بانكنوتتار مەن مونەتالاردىڭ نەگىزگى سيپاتتامالارى مەن ديزاينى تۋرالى اقپارات ۇلتتىق بانكتىڭ رەسمي سايتىندا جاريالانادى»، - دەپ تولىقتىردى ۆەدومستۆو وكىلدەرى.
سونداي-اق، بانك وكىلدەرى مۇنداي بانكنوتتاردى قابىلداۋدان باس تارتقان جاعدايدا اكىمشىلىك قۇقىق بۇزۋشىلىق تۋرالى كودەكستىڭ 206-بابىنا سايكەس اكىمشىلىك جاۋاپكەرشىلىك كوزدەلەتىنىن ايتتى.
