باقىتگۇل حامەنوۆانىڭ نەبارى 20 مينۋتقا سوزىلعان سوت وتىرىسى كەيىنگە شەگەرىلدى
سوت وتىرىسى بۇگىن، 3-تامىزدا اتىراۋ قالاسىنداعى №2-سوتتا باستالىپ، نەبارى 20 مينۋتقا سوزىلدى. سوت وتىرىسى 11-تامىزعا اۋىستىرىلدى. بۇعان باقىتگۇل حامەنوۆانىڭ ايىپتاۋ اكتىسىنىڭ كوشىرمەسىن الماۋى سەبەپ بولعان. بۇعان دەيىن باقىتگۇل حامەنوۆاعا قاتىستى قىلمىستىق ءىس سوتقا جەتكەنىن حابارلاعان ەدىك.
وبلىستىق سوتتىڭ باسپا ءسوز قىزمەتىنەن ءمالىم ەتكەندەي، بيىلعى 26-مامىردا اتىراۋ قالاسىنىڭ №2-سوتىنا ق ر قىلمىستىق كودەكسىنىڭ 366-بابىنىڭ 3-بولىگىنىڭ 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە، ق ر قىلمىستىق كودەسىنىڭ 367-بابىنىڭ 2-بولىگىمەن «ب» ج ش س-نىڭ ديرەكتورىنا قاتىستى قىلمىستىق ءىس تۇسكەن.
سىبايلاس جەمقورلىققا قارسى قىزمەت ءوزىنىڭ Telegram پاراقشاسىندا ءمالىم ەتكەندەي، اتىراۋ وبلىسى اكىمىنىڭ ورىنباسارى مەن مادەنيەت، ارحيۆتەر جانە قۇجاتتاما باسقارماسى باسشىسىنا قاتىستى تەرگەۋ باستادى.
ولار اتىراۋ قالاسىندا اباي ەسكەرتكىشىن جاساۋ جانە ورناتۋ بويىنشا 145 ميلليون تەڭگە سوماسىنا مەملەكەتتىك ساتىپ الۋ شارتىن جاساعانى ءۇشىن ءبىر توپ اداممەن الدىن الا ءسوز بايلاسۋ ارقىلى ج ش س باسشىسىنان 4,5 ميلليون تەڭگە سوماسىندا پارا الۋ كۇدىگىنە ءىلىندى. باقىتگۇل حامەنوۆا بىلتىرعى جەلتوقساندا ۇستالىپ، قاماۋعا الىندى.
وسىعان بايلانىستى باستى سوت وتىرىسىن 2022 -جىلعى 14-ماۋسىمدا ساعات 14:45-تە وتكىزۋ بەلگىلەنگەن بولاتىن. الايدا، سوت وتىرىسىنىڭ ۋاقىتى شەگەرىلدى.
بۇعان سۋديانىڭ وزگە قىلمىستىق ءىس بويىنشا كەڭەسۋ بولمەسىنە كەتۋى سەبەپ بولعان. كەيىن ءىس بويىنشا وتىرىس 3-تامىزعا بەلگىلەندى. باقىتگۇل حامەنوۆا اتىراۋ وبلىسى اكىمىنىڭ ورىنباسارى بولىپ 2020 -جىلعى 13-ناۋرىزدا تاعايىندالدى.
