الماتىدا كوك بازار جابىلدى: بازار اكىمشىلىگىنەن 20 ادام كوروناۆيرۋس جۇقتىرعان

الماتى. قازاقپارات - الماتىنىڭ باس سانيتار دارىگەرى جەكە پروفيلاكتيكا شارالارىن ساقتاپ، ادام كوپ جينالاتىن ورىندارعا بارماۋعا شاقىرادى، دەپ حابارلايدى قازاقپارات ءتىلشىسى.

الماتى قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى كوك بازار اۋماعىنداعى «كومپانيا دوستار- كوممەرتس» بازارى قىزمەتكەرلەرىنىڭ اراسىندا كوروناۆيرۋس ينفەكسياسىن جۇقتىرۋ وقيعالارىنىڭ تىركەلۋىنە بايلانىستى ءتيىستى شارالار مەن ەپيدەميولوگيالىق زەرتتەۋ جۇرگىزۋ ءۇشىن كوك بازاردىڭ جۇمىسى توقتاعانىن حابارلايدى.

الماتى قالاسىنىڭ باس مەملەكەتتىك سانيتار دارىگەرى جانداربەك بەكشين كاسىپكەرلىك سۋبەكتىلەرىنىڭ كارانتين رەجيمىن ساقتاۋىن باقىلاۋ ماقساتىندا قۇرامىندا پوليتسيا دەپارتامەنتى، ت ق س ق ب د اۋداندىق باسقارمالارى، «اتامەكەن» كاسىپكەرلەر پالاتاسىنىڭ وكىلدەرى بار اكىمدىكتىڭ مونيتورينگ توپتارى جۇمىس ىستەيتىنىن اتاپ ءوتتى.

وسىعان دەيىن مونيتورينگتىك توپتاردىڭ تەكسەرۋى بارىسىندا كوك بازار اۋماعىندا جۇمىسشىلار مەن ساتۋشىلار ءۇشىن بايلانىسسىز تەرمومەتريانىڭ ساقتالماۋى، الەۋمەتتىك قاشىقتىقتىڭ ساقتالماۋى جانە كەلۋشىلەر اراسىندا قاشىقتىق ساقتاۋ ءۇشىن ارنايى بەلگىلەردىڭ بەلگىلەنبەۋى، جەكە قورعانىس قۇرالدارىن ءتيىسسىز قولدانۋ جانە ۋتيليزاتسيالاۋ، ءتيىستى جۇمىس رەجيمىنىڭ ورىندالماۋى سىندى ءتارتىپ بۇزۋشىلىقتار انىقتالدى.

انىقتالعان ءتارتىپ بۇزۋ فاكتىلەرىنە بايلانىستى ق ر ا ق ت ك 425-بابىنىڭ 2-تارماعىنا سايكەس حاتتاما تولتىرىلىپ، مەدەۋ اۋدانىنىڭ باس مەملەكەتتىك سانيتار دارىگەرىنىڭ 2020 -جىلدىڭ 13- ماۋسىمىنان باستاپ «كومپانيا دوستار- كوممەرتس» قىزمەتىن سوت شەشىمى شىققانعا دەيىن توقتاتۋ تۋرالى قاۋلىسى شىقتى.

قازىرگى ۋاقىتتا اكىمشىلىك ءىستىڭ ماتەريالدارى الماتى قالاسىنىڭ مامانداندىرىلعان اكىمشىلىك سوتىنا بەرۋگە ازىرلەنۋ ۇستىندە.

بازار اكىمشىلىگىنەن كوروناۆيرۋس ينفەكسياسىن جۇقتىرۋدىڭ ءبىرىنشى وقيعاسىن زەرتتەۋ بارىسىندا تاعى 19 جاعداي انىقتالدى، ول دا اكىمشىلىك قاتارىنان شىققان.

وسىلايشا، كوك بازاردا ىندەتتى جۇقتىرعان قىزمەتكەرلەر سانى 20-عا جەتكەن. ساتۋشىلار اراسىنان جۇقتىرۋ وقيعالارى انىقتالمادى.

قايتىس بولعان ادامعا قاتىستى (بازار اكىمشىلىگىنىڭ ۇيىمداستىرۋ ءبولىمىنىڭ قىزمەتكەرى) ونىڭ ءولىمىنىڭ سەبەپتەرىن قالالىق قوعامدىق دەنساۋلىق ساقتاۋ باسقارماسىنىڭ جانىنداعى ءولىم سەبەپتەرىن زەرتتەيتىن كوميسسيا انىقتايدى.

اۆتور:الما مۇقانوۆا