گرۋزيا قازاقستانعا 20 جىلدىق قارىزىن قايتارىپ جاتىر

 استانا. قازاقپارات - گرۋزيانىڭ قازاقستان الدىنداعى نەگىزىگى قارىزى 25 ميلليون 480 مىڭ 089,96 دوللاردى قۇرايدى.

بۇل تۋرالى Sputnik قازاقستان باسىلىمى حابارلايدى.

گرۋزيادا قيىن ەكونوميكالىق جاعدايلار ورىن العان سوڭ، بىلتىر قارىزدىڭ قۇرىلىمىن وزگەرتۋ جۇزەگە اسقان.

«نەگىزگى قارىز وزگەرگەن جوق. ونى قايتارۋ ۋاقىتى وزگەرتىلدى. جالپى، قايتارىلۋى ءتيىس سوما - 37997815,46 ا ق ش دوللارى»، - دەپ مالىمدەدى قارجى مينيسترلىگىندەگىلەر.

مەملەكەتتىك قارىزدى قايتارۋ مەرزىمى - 2017-2025-جىلدار ارالىعى. قازىرگى ۋاقىتتا تولەم بەلگىلەنگەن مەرزىمدە، كولەمدە جۇرگىزىلىپ جاتىر. بۇل تۋرالى ۆەدومستۆودا ايتىلدى.

2018-جىلدىڭ قىركۇيەك ايى بويىنشا، قازاقستاننىڭ الدىندا وزگە شەتەلدىك مەملەكەتتەردىڭ قارىزى جوق.

قازاقستان گرۋزياعا 1990-جىلداردىڭ ورتاسىندا 27,5 ميلليون دوللاردى قارىزعا بەرگەن. وسىعان دەيىن، گرۋزيانىڭ قارىزدى 2017-جىلدان باستاپ قايتارىپ جاتقاندىعى حابارلانعان ەدى.