جاس جىگىت سيرەك كەزدەسەتىن اۋرۋىنا بايلانىستى 20 جىلعا جۋىق تەك ەكى ءتۇرلى تاعام جەدى

 استانا. قازاقپارات - بريتاندىق جىگىت سيرەك كەزدەسەتىن اۋرۋىنا بايلانىستى 17 جىل بويى تاۋىق ەتىنەن جاسالعان ناگگەتس پەن قۋىرىلعان كارتوپ جەپ كەلدى.

 20 جىلعا جۋىق وسى تاعامداردان باسقا استى مۇلدە اۋزىنا الماعان رايان حوۆارت وسى ارەكەتىنە بايلانىستى اقىرى وتباسىمەن جاڭجالداسىپ قالدى، دەپ جازادى Stan.kz اقپاراتتىق اگەنتتىگى.

اندوۆەر قالاسىنىڭ گەمپشير گرافتىعىندا تۇراتىن جىگىت ءتورت جاسىنان بەرى جىلدام ازىرلەنەتىن تاعامنان باسقا ەشقانداي تاماقتى جەگىسى كەلمەگەن. 21 جاستاعى حوۆارت تەك اراسىندا عانا ستەيك، شۇجىق، ماكارون نەمەسە كونفەت جەپ ءجۇردى. ءبىراق ونىڭ تاماقتانۋ راتسيونىنىڭ 90 پايىزى نانگەتتەر مەن كارتوپتان تۇردى. ەگەر وعان باسقا ءبىر تاعامدى ۇسىنسا، ول 20 مينۋت بويى شۋ كوتەرىپ، ونى جەۋدەن ءۇزىلدى- كەسىلدى باس تارتىپ وتىرعان.

 

«باسقا تاعامداردى جەپ كورسەڭشى دەسە، مەن قاراپايىم ادامدار جاندىكتەردىڭ ءدامىن تاتىپ كورۋ سەكىلدى ۇسىنىستارعا قانداي جيىركەنىشپەن قاراسا، مەن دە باسقا تاماقتارعا سولاي قارايمىن. باسقا تاعامدار ماعان تىم تاڭسىق كورىندى» ، - دەپ ءتۇسىندىردى جىگىت.

رايان ءومىر بويى ونىڭ دەنساۋلىعىنا الاڭداپ جۇرەتىن اتا- اناسىمەن تاماقتانۋ تارتىبىنە بولا ءجيى ۇرىساتىن. ول ەشقاشان وتباسىلىق تاعامداردان ءدام تاتىپ كورمەگەن جانە تەك بولمەسىندە عانا تاماقتانىپ ءجۇردى.

ءبىراق، حوۆارت ەسەيگەندە ونىڭ تاماقتانۋ ءۇردىسىنىڭ بۇزىلعانى بايقالدى. جاس جىگىت پسيحوتەراپيەۆتتىڭ قابىلداۋىنا بىرنەشە رەت بارعاننان كەيىن، تاماقتانۋعا قاتىستى پسيحولوگيالىق كەدەرگىنى جەڭە الدى.

«بۇل كەرەمەت، ءبىراق ماعان بۇرىن قاراۋدىڭ ءوزى جيىركەنىشتى بولعان تاعامدار ۇناي باستادى. ءدامدى مە، ءدامسىز بە قاراماي بارلىق تاعامنىڭ ءدامىن تاتىپ كورەمىن» ، - دەيدى بريتاندىق جىگىت.

سونداي- اق، ول باسقا تاعامداردى تۇتىنا باستاعاننان كەيىن ءوزىن الدەقايدا ساۋ جانە كۇشتى سەزىنەتىنىن ايتتى.