ساراپشى 2030 - جىلى قازاقستاندىقتاردىڭ سانى قانشا بولاتىندىعىن ايتتى

استانا. قازاقپارات - بۇل تۋرالى ماجىلىستەگى پارلامەنتتىك تىڭداۋدا جۇمىسپەن قامتۋ سالاسىنداعى ۇلتتىق ساراپشى جاقسىبەك كۇلەكەيەۆ الداعى 12 جىلدا قازاقستان حالقىنىڭ ءوسىمى بويىنشا دەرەكتەردى جاريا ەتتى، دەپ حابارلايدى قازاقپارات.

 «بولجامدار بەلگىلى ءبىر جاعدايلارعا سۇيەنىپ جاسالاتىنى سىزدەرگە بەلگىلى. ءبىزدىڭ دە وسى 2031 -جىلعا دەيىنگى بولجاۋىمىز ءتيىستى جاعدايلاردى ەسكەرىپ، جۇزەگە اسىرىلدى. بىرىنشىدەن، سوڭعى 15 جىلدى ەلىمىزدەگى حالىقتىڭ ءوسۋ قارقىنى جامان بولعان جوق. جالپى، حالىقتىڭ ورتاشا جىلدىق ءوسىمى 1,2- ءنى قۇرادى. سوعان سەبەپ بولعان ەلىمىزدەگى جالپى حالىقتىڭ تابيعي ءوسىمى، ياعني 2001 -جىلمەن سالىستىرعاندا سوڭعى كەزدەرى 3 ەسەگە دەيىن وسكەنىنىڭ ارقاسىندا بولىپ وتىر. ەكىنشىدەن، قازاقستان وڭىرلەرىندەگى حالىقتىڭ ءوسۋ قارقىنى ءارتۇرلى بولدى. مىسالى، ەڭ جوعارى ءوسىم استانا قالاسىندا بايقالدى. ماڭعىستاۋ وڭىرىندە دە وڭتايلى قارقىن بار. بۇل جەرلەردە حالىقتىڭ سانى 15 جىلدا 2 ەسەدەن جوعارى كورسەتكىشتى كورسەتتى»، - دەدى كۇلەكەيەۆ.

سونىمەن قاتار، ول قازاقستاننىڭ وڭتۇستىك ايماقتارىندا دا حالىقتىق ءوسۋ كورسەتكىشى جاقسى ەكەنىن تىلگە تيەك ەتتى.

 «ءتيىستى سەبەپتەردى ەسكەرە وتىرىپ، 2030 -جىلى حالىقتىڭ سانى 20 ميلليون 560 مىڭعا جەتۋى مۇمكىن. بۇل تۇرعىدا سولتۇستىك قازاقستان مەن قوستاناي وبلىستارىندا بۇل كەزەڭدە دە حالىقتىڭ ازايۋى جالعاسا بەرەتىنىن بايقايمىز. مۇنىمەن قوسا، 2030 -جىلعا دەيىنگى مەرزىمدە شىمكەنت قالاسى مەن استانا قالاسىندا حالىقتىڭ قارقىندى ءوسۋى بايقالماق. ماڭعىستاۋ مەن اتىراۋ وبلىسىندا دا حالىق سانىنىڭ ءوسۋى وتە جوعارى دەڭگەيدە بولادى. كەيبىر وڭىرلەردە سونىڭ ىشىندە رەسەيمەن شەكارالاس ايماقتاردا حالىقتىڭ ءوسۋى كوڭىلدەگىدەي بولمايدى. اتاپ وتكەنىمدەي، سولتۇستىك قازاقستان وبلىسىندا ءوسۋ بايقالمايدى»، - دەدى جاقسىبەك كۇلەكەيەۆ.

اۆتور: رۋسلان عابباسوۆ