2028-جىلعى وليمپيادا: لوس-اندجەلەستە اۋە تاكسي قىزمەتى جوسپارلانىپ وتىر
استانا. KAZINFORM - ەگەر ۇيىمداستىرۋشىلار ءوز جوسپارلارىن جۇزەگە اسىرا السا، 2028-جىلعى وليمپيادا ويىندارى كەزىندە كورەرمەندەر لوس-اندجەلەس اسپانىندا ساياحاتتاپ، قالانىڭ كەپتەلىستەرىنەن اۋلاق جۇرە الادى، دەپ حابارلايدى BBC.
قالاداعى ءۇشىنشى جازعى وليمپيادا ويىندارىنا جاۋاپتى LA28 ۇيىمداستىرۋ كوميتەتى وليمپيادا جانە پاراليمپيادا ويىندارى كەزىندە اۋە تاكسي قىزمەتىن كورسەتۋ ماقساتىندا Archer Aviation كومپانياسىمەن سەرىكتەستىك تۋرالى جاريالادى.
كومپانيا جانكۇيەرلەردى سپورت الاڭدارىنا جانە كەرى تاسىمالداۋ ءۇشىن اۋە اپپاراتتارى پاركىن پايدالانۋدى جوسپارلاپ وتىرعانىن رەسمي تۇردە مالىمدەدى.
- ءبىز ادامداردىڭ لوس-اندجەلەستە قوزعالۋ ءتاسىلىن وزگەرتكىمىز جانە امەريكاداعى كولىكتىڭ بولاشاعىن قالىپتاستىراتىن مۇرا قالدىرعىمىز كەلەدى. مۇنى ىستەۋ ءۇشىن LA28 ويىندارىنان ارتىق ۋاقىت جوق، - دەدى Archer Aviation كومپانياسىنىڭ باس ديرەكتورى جانە نەگىزىن قالاۋشى ادام گولدشتەين.
ۇشاتىن تاكسي يدەياسى سالادا بۇرىننان تالقىلانىپ كەلەدى. ولاردى ۇشىرۋ 2024-جىلعى پاريج وليمپياداسىندا جوسپارلانعان بولاتىن، الايدا اۋە اپپاراتتارى ەۋروپالىق اۆياتسيالىق قاۋىپسىزدىك اگەنتتىگىنەن قاجەتتى سەرتيفيكات الماعان. وسىعان ۇقساس جاعداي ا ق ش- تا دا قالىپتاسقان: Archer Aviation ءالى فەدەرالدىق اۆياتسيا باسقارماسىنان (FAA) سەرتيفيكات الماعان، ياعني ونىڭ ۇشاقتارى كوممەرتسيالىق پايدالانۋعا ءالى دايىن ەمەس.
ەگەر كومپانيا 2028-جىلعى ويىندارعا ۋاقىتىندا سەرتيفيكاتتاۋدان ءوتىپ ۇلگەرسە، اۋە تاكسيلەرى نەگىزگى نۇكتەلەردى، سونىڭ ىشىندە ايماقتىڭ ءىرى وليمپيادالىق ارەنالارىن بايلانىستىرىپ، قالا تۇرعىندارى مەن قوناقتارىنا 10-20 مينۋتتىق رەيستەردى ۇسىنا الادى.
ازىرگە مۇنداي ساپاردىڭ اقىسى قانشا بولاتىنى بەلگىسىز، دەگەنمەن، تۇتىنۋشىلار اۋە تاكسيىنە موبيلدى قوسىمشا ارقىلى تاپسىرىس بەرە الاتىنى بەلگىلى.
بۇدان بۇرىن وليمپيادا جانە پاراليمپيادا ويىندارىنىڭ جۇلدەگەرلەرى دە سىياقى الاتىنى حابارلاندى.
