بۇگىن ءبىرقاتار وڭىردە ۇسىك ءجۇرىپ، شاڭدى داۋىل تۇرادى

استانا. KAZINFORM - قازگيدرومەت سينوپيكتەرى 17-قىركۇيەك، سەيسەنبىگە ارنالعان اۋا رايى بولجامىن جاريالادى.

اۋقىمدى انتيسيكلوننىڭ ىقپالىمەن قازاقستاننىڭ باسىم بولىگىندە جاۋىن-شاشىنسىز اۋا رايى ساقتالادى.

ەلدىڭ سولتۇستىگىندە، وڭتۇستىگىندە، وڭتۇستىك-شىعىسىندا فرونتتاردىڭ اسەرىنەن نايزاعاي جارقىلداپ، جاڭبىر جاۋادى.

رەسپۋبليكا بويىنشا جەل كۇشەيەدى، وڭتۇستىكتە شاڭدى داۋىل سوعادى.

سولتۇستىكتە، شىعىستا، وڭتۇستىك-شىعىستىڭ تاۋلى اۋداندارىندا تۇنگى جانە تاڭەرتەڭگى ۋاقىتتا تۇمان تۇسەدى.

اباي وبلىسىنىڭ شىعىسىندا، ورتالىعىندا، شىعىس قازاقستان، سولتۇستىك قازاقستان، پاۆلودار وبلىستارىنىڭ سولتۇستىگىندە، شىعىسىندا، قوستاناي، قاراعاندى وبلىستارىنىڭ شىعىسىندا، اقمولا وبلىسىنىڭ سولتۇستىگىندە، شىعىسىندا، جەتىسۋ وبلىسىنىڭ تاۋلى اۋداندارىندا 1-4 گرادۋس ۇسىك جۇرەدى.

بارلىق دەرلىك وڭىردە ءالى دە توتەنشە ءورت قاۋپى ساقتالىپ تۇر.