زەينەتاقى جيناعىن پايدالانۋ: 2023 -جىلعا ەڭ تومەنگى جەتكىلىكتىلىك شەگى بەلگىلەندى

قور مالىمەتىنشە، 2023 -جىلعا بەلگىلەنگەن ەڭ تومەن جەتكىلىكتىلىك شەگى جاس مولشەرىنە بايلانىستى 3 تەن 10 ميلليون تەڭگەگە دەيىنگى سوما بولادى.

كەلەسى جىلعا ەڭ تومەنگى جالاقى 70 مىڭ تەڭگەنى، ەڭ تومەنگى زەينەتاقى 53076 تەڭگەنى، مەملەكەتتىك بازالىق زەينەتاقى تولەمىنىڭ ەڭ تومەنگى مولشەرى 24341 تەڭگەنى، ەڭ تومەنگى كۇنكورىس دەڭگەيى 40567 تەڭگەنى قۇرايدى دەپ كوزدەلگەن.

بەكىتىلگەن ادىستەمەگە سايكەس، ەڭ تومەنگى جەتكىلىكتى شەك شامالارى ءار جاس مولشەرى ءۇشىن جەكە انىقتالادى جانە بولاشاق زەينەتاقى تولەمدەرى مەن زەينەتاقى جارنالارىنىڭ ءوسۋىن (يندەكستەلۋىن) ەسكەرەدى.

ناقتىراق ايتقاندا، ەڭ تومەنگى جەتكىلىكتىلىك شەگى - بۇل سالىمشىنىڭ زەينەتكە شىققاننان كەيىن ەڭ تومەنگى بازالىق زەينەتاقىمەن قوسا ەڭ تومەنگى زەينەتاقىدان كەم ەمەس جيىنتىق تولەمدەر الۋى ءۇشىن شوتىندا قالۋعا ءتيىستى ەڭ تومەنگى سوما.

وسىلايشا، 2023 -جىلى 20 جاستاعى سالىمشى زەينەتاقى شوتىنداعى 3 ميلليون 260 مىڭنان، 30 جاستاعى سالىمشى 4 ميلليون 580 مىڭنان، 40 جاستاعى سالىمشى 6 ميلليون 100 مىڭنان، 50 جاستاعى سالىمشى 7 ميلليون 860 مىڭنان، 60-62 جاستاعى سالىمشىلار 9 ميلليون 890 مىڭنان اسقان سومانى مەرزىمىنەن بۇرىن پايدالانا الادى.