سايلاۋ-2022: حالىقارالىق ۇيىمداردىڭ ەكى بايقاۋشىسىن اككرەديتتەۋ كەرى قايتارىلدى
بۇل تۋرالى ورتالىق سايلاۋ كوميسسياسىنىڭ حاتشىسى مۇحتار ەرمان مالىمدەدى، دەپ حابارلايدى قازاقپارات ءتىلشىسى.
ق ر ورتالىق سايلاۋ كوميسسياسىنىڭ كەزەكتى وتىرىسىندا حالىقارالىق ۇيىمداردىڭ بايقاۋشىلارىن 20- قاراشاداعى كەزەكتەن تىس ق ر پرەزيدەنتى سايلاۋىنا اككرەديتتەۋدى كەرى قايتارىپ الۋ ماسەلەسى قارالدى.
«10- قاراشادا شاڭحاي ىنتىماقتاستىق ۇيىمىنىڭ وكىلى شاۋ چەن اككرەديتتەۋدەن ءوتتى. ءبىراق ول سايلاۋعا حالىقارالىق باقىلاۋشى رەتىندە قاتىسا المايدى. وسىعان بايلانىستى دەلەگاتسيا قۇرامىنا ءتيىستى وزگەرىس ەنگىزۋ قاجەت. بۇدان باسقا، 14- قاراشادا ق ر ورتالىق سايلاۋ كوميسسياسىنا ق ر سىرتقى ىستەر مينيسترلىگىنىڭ ۇسىنىسى كەلىپ ءتۇستى. وعان سايكەس 2022-جىلعى 20- قاراشاعا تاعايىندالعان كەزەكتەن تىس پرەزيدەنت سايلاۋىنا اككرەديتتەلگەن يسلام ىنتىماقتاستىعى ۇيىمى دەلەگاتسياسىنىڭ قۇرامىنا ءتيىستى وزگەرىس ەنگىزۋ قاجەت. ۇسىنىس ديپلوماتيالىق ارنا ارقىلى الىندى. باياندالعان مالىمەتتى ەسكەرە وتىرىپ، ورتالىق سايلاۋ كوميسسياسى قاۋلىسىنىڭ جوباسى دايىندالدى. وسى ورايدا شاڭحاي ىنتىماقتاستىق ۇيىمىنان شاۋ چەن جانە يسلام ىنتىماقتاستىعى ۇيىمى اتىنان شاكير ماحمۋدتى حالىقارالىق بايقاۋشى رەتىندە اككرەديتتەۋدى توقتاتىپ، كۋالىكتەرىن كەرى قايتارىپ الۋ قاجەتتىلىگى تۋىندايدى»، - دەدى مۇحتار ەرمان ورتالىق سايلاۋ كوميسسياسىنىڭ وتىرىسىندا.
ورتالىق سايلاۋ كوميسسياسىنىڭ مۇشەلەرى اتالعان قاۋلىنى ءبىر اۋىزدان قولدادى. وسىلايشا، و س ك حالىقارالىق ۇيىمداردىڭ ەكى بايقاۋشىسىن اككرەديتتەۋدى الىپ تاستادى.
