جەڭىل اتلەتيكا: قىتايدا وتەتىن الەم چەمپيوناتى 2021-جىلعا اۋىستىرىلدى
ق ر ۇلتتىق وليمپيادالىق كوميتەتى حابارلاعانداي، الەم چەمپيوناتى ۇستىمىزدەگى جىلدىڭ 13-15 - ناۋرىز ارالىعىندا قىتايدىڭ نانكين قالاسىندا ءوتۋى كەرەك بولاتىن. الايدا، حالىقارالىق فەدەراتسيانىڭ باسپا ءسوز قىزمەتى اتالعان بىرىنشىلىكتى (2020-جىلدىڭ 13-15 - ناۋرىزى) 2021-جىلدىڭ ناۋرىزىنا اۋىستىرۋ تۋرالى شەشىم قابىلداعانىن جاريالادى.
«قىتاي كوروناۆيرۋسپەن كۇرەستە ايانىپ قالمايدى. ال ءبىز سول ءۇشىن ولارعا بار جاعدايدى جاساۋىمىز قاجەت. ءبىز سپورتشىلار مەن فەدەرالدى بيلىكتەرگە جانە سەرىكتەستەرگە بۇل ايماقتاعى سپورتتىق جارىسقا قاتىستى ماسەلەنىڭ قالاي شەشىلىپ جاتقانىن ناقتى جەتكىزۋىمىز كەرەك. بۇل الەم چەمپيوناتىن وتكىزبەۋ تۋرالى شەشىم قابىلداعان جوقپىز. ويتكەنى، كوپتەگەن سپورتشىلار بۇل ءتۋرنيردى اسىعا كۇتىپ ءجۇر. سول سەبەپتى، جارىستى 2021-جىلعا اۋىستىردىق»، - دەلىنگەن حابارلامادا.
ەستەرىڭىزگە سالا كەتەيىك، وسىعان دەيىن حابارلاعانىمىزداي قىتايدىڭ ۋحان قالاسىندا (حۋبەي پروۆينتسياسى) تاراعان كوروناۆيرۋس ىندەتىنە بايلانىستى حانچجوۋدا جوسپارلانعان جابىق كەشەندەگى IX ازيا چەمپيوناتى دا وتپەيتىنى تۋرالى جازعان بولاتىنبىز.
سونداي-اق، قىتايدىڭ دۋنگۋان قالالىق وكرۋگىندە 4-8 - اقپان ارالىعىندا تەننيستەن ءوتۋى ءتيىس بولعان فەدەراتسيا كۋبوگى كوروناۆيرۋستىڭ تاراۋىنا بايلانىستى ول ەلدە وتپەيتىنى بەلگىلى بولعان.
بۇعان قوسا حالىقارالىق وليمپيادا كوميتەتىنىڭ جۇمىس توبى قىتايدىڭ ۋحان قالاسىندا ءوتۋى ءتيىس بوكستان 2020-جىلعى توكيو وليمپياداسىنا ازيا/وكەانيا ايماقتىق ىرىكتەۋ ءتۋرنيرىن دە ءقاۋىپتى ۆيرۋستىڭ تارالۋىنا بايلانىستى وزگە ەلدە وتكىزۋگە شەشىم قابىلداعان ەدى .
اۆتور: كۇنسۇلتان وتارباي
