توكيو-2020 پاراليمپياداسىنا قازاقستاننان 25 سپورتشى قاتىسادى
بۇل سىنعا قازاقستاننىڭ اتىنان 25 پاراليمپياداشى قاتىسىپ، سپورتتىڭ 7 ءتۇرى بويىنشا ەل نامىسىن قورعايدى. «پاراليمپيادا ويىندارى قارساڭىندا «قازاقستاننىڭ پاراليمپيادا سپورتىن قولدايمىز» چەللەندجى باستالدى. ريو-2016 پاراليمپيادا ويىندارىنان كەيىن ەلىمىزدە پاراسپورتپەن اينالىسقىسى كەلەتىندەردىڭ سانى ارتتى، وڭىرلەردە مۇگەدەك ادامدارعا ارنالعان جاڭا سپورت مەكتەپتەرى اشىلدى جانە ەلوردادا ۋلترازاماناۋي پاراليمپيادالىق جاتتىعۋ ورتالىعى سالىندى. وندا مۇمكىندىگى شەكتەۋلى ادامدار وزىنە قولايلى سپورت تۇرىمەن تەگىن اينالىسا الادى»، - دەپ جازىلعان ۇلتتىق پاراليمپيادا كوميتەتى ماركەتينگ جانە كوممۋنيكاتسيا دەپارتامەنتىنىڭ حابارلاماسىندا.
كوميتەت جاريالاعان چەللەدجگە قاتىسۋ ءۇشىن پاراليمپياداشىلارعا قولداۋ بىلدەرگەن مازمۇنداعى بەينەۇندەۋ ءتۇسىرىپ، الەۋمەتتىك جەلىگە ن پ ك @kazparalympics رەسمي اككاۋنتىن بەلگىلەۋ ارقىلى مىنا حەشتەگتەرمەن سالۋ قاجەت: #teamkz, #kazparalympics جانە #parateamkz.
چەللەندجگە ءبىرىنشى بولىپ نۇرلان قويانبايەۆ، ارۋجان ساين، ماقپال يسابەكوۆا، ءمولدىر اۋەلبەكوۆا، بەيبىت قورعان، ەرلان كوكەيەۆ، باقىت سىزدىقوۆا سياقتى تانىمال ادامدار ءۇن قوسقان.
