ەلوردادا «قازاقستان ارۋى-2019» بايقاۋى باستالدى
وسىمەن 22-شى جىل قاتارىنان ءوتىپ جاتقان سۇلۋلىق بايقاۋىنا بيىل 7 مىڭنان استام ءوتىنىم كەلىپ تۇسكەن.
بۇگىنگە دەيىن ەلىمىزدىڭ بارلىق وڭىرىندە ىرىكتەۋ كەزەڭى ءوتىپ، اقتىق سىنعا 32 قاتىسۋشى تاڭدالىنىپ الىندى. سونداي-اق، ولار وسىعان دەيىن «سۇلۋلىق پەن مەيىرىمدىلىك» دەگەن ۇرانمەن ەلدە بولىپ جاتقان ءتۇرلى قايىرىمدىلىق، مادەني جانە سپورتتىق ءىس- شارالارعا قاتىستى.
ودان بولەك، ۇمىتكەرلەردىڭ قاتىسۋىمەن جارنامالىق-تانىمدىق بەينەروليكتەر توپتاماسى ءتۇسىرىلدى. قىسقا مەتراجدى فيلمدە ءار ايماقتىڭ قاتىسۋشىسى ءوز ءوڭىرىنىڭ تۋريستىك مۇمكىندىكتەرىن پاش ەتتى.
«باعالاۋشى رەتىندە ارۋلاردىڭ ىشكى جانە سىرتقى سۇلۋلىعىنىڭ ساي كەلگەنىن قالايمىن. جانە ارۋلار حالىققا قىزمەت ەتسە ەكەن دەيمىن، ويتكەنى ول ەل ارۋى ياعني حالىقتىڭ ادامى. ودان بولەك، ارينە ۇلتتىق قۇندىلىقتاردى بىلگەنى جانە ساقتاعانى دۇرىس. وعان انا تىلىنەن باستاپ سالت- ءداستۇر، ادەپ- عۇرىپ ءبارى جاتادى. ارينە سالت- ءداستۇر، ادەت- عۇرىپتى جاستار تۇگىلى ۇلكەندەر دە بىلە بەرمەيدى. سوندىقتاندا ەڭ بولماسا حابارلارى بولسا»، - دەدى «قازاقستان ارۋى - 2019» بايقاۋى ءادىلقازىلار القاسىنىڭ ءتورايىمى ىرزا تۇرسىنزادا.
ۇيىمداستىرۋشىلاردىڭ ايتۋىنشا بايقاۋدىڭ ءادىل بولۋى مەن اشىقتىعىن قامتاماسىز ەتۋ ماقساتىندا قازىلار القاسى فينالعا شىعاتىن 5 ارۋدى تاڭدايدى، ودان ءارى قازاقستاندىقتاردىڭ ونلاين جانە SMS ارقىلى داۋىس بەرۋى ەسەپكە الىنادى.