حالىق ساناعىنىڭ 2019 -جىلى جۇرگىزىلەتىن ەرەكشەلىگى ايتىلدى
استانا. قازاقپارات - قازاقستان حالقىنىڭ سانىن انىقتاۋ ءۇشىن كەزەكتى جالپى ساناقتى جۇرگىزەتىن ۋاقىت تاياپ كەلەدى، دەپ حابارلايدى قازاقپارات ءتىلشىسى.
«قازاقستاندا ساناق ءاربىر ون جىلدا وتەتىنىن بىلەسىزدەر. بيىل ەكى وڭىردە: اقمولا وبلىسىنىڭ بۋراباي اۋدانىندا جانە شىعىس قازاقستان وبلىسىنىڭ اياگوز اۋدانىندا حالىق ساناعى بويىنشا پيلوتتىق جوبا ىسكە اسىرىلدى»، - دەيدى استانا ستاتيستيكا دەپارتامەنتىنىڭ ديرەكتورى قۇندىزبەك ءابدىراسىلوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەردىڭ ايتۋىنشا، 2019 -جىلدىڭ قاراشا ايىنا جوسپارلانىپ وتىرعان نەگىزگى حالىق ساناعى ەرەكشە بولماق - بۇل جولى وعان سيفرلىق اقپاراتتىق يننوۆاتسيالىق تەحنولوگيالار پايدالانىلادى.
قۇندىزبەك ءابدىراسىلوۆ بيۋدجەتتىك ۇيىمداردىڭ قىزمەتكەرلەرى حالىق ساناعىنا جۇمىلدىرىلمايتىنىن جەتكىزدى.
«ءبىز ساناق جۇمىسىنا ەرىكتىلەردى جانە «نۇر وتان» پارتياسىن شاقىرامىز. قازاقستاندا حالىق ساناعىن جۇرگىزۋگە قاتىسامىن دەۋشىلەرگە قاشاندا ەسىك اشىق. ول ءۇشىن 2019 -جىلى استانا قالاسىنىڭ ستاتيستيكا دەپارتامەنتىنە جۇگىنۋ قاجەت»، - دەدى ول.
استانا ستاتيستيكا دەپارتامەنتىنىڭ ديرەكتورى قازىرگى كەزدە ساناققا قاتىسۋشىلارعا اقى تولەۋ ماسەلەسى قارالىپ جاتقانىن دا ايتتى.
ەسكە سالا كەتەيىك، سوڭعى رەت قازاقستاندا حالىق ساناعى 2009 -جىلى جۇرگىزىلگەن بولاتىن.
