ازيادا-2018: جالپى كوماندالىق ەسەپتە قازاقستان ەكى ورىن العا كوتەرىلدى
سونداي-اق، بۇل كۇنى قازاقستاندىق ۆاتەرپولشىلار اسا تارتىستى وتكەن ماتچتا جەڭىسكە جەتتى، دەپ حابارلايدى Olympic.kz.
وسى كۇننىڭ باستى وقيعالارى.
بايداركا مەن كانوەدە ەسكەك ەسۋشىلەر ىرىكتەۋدەن سۇرىنبەي ءوتتى. 1- قىركۇيەكتە قازاقستاندىق سپورتشىلار التى باعدارلاما بويىنشا فينالدا باق سىنايدى. پالەمبانگتا وتەتىن ەسكەك ەسۋشىلەر دوداسىنىڭ تاڭعى ساعات 07.30-دا باستالاتىنىن ەسكە سالامىز.
ترياتلونشى اناستاسيا اۆتۋشكو ۇزدىك وندىقتان سىرت قالدى. ول ءجۇزۋ، ۆەلوجارىس جانە جۇگىرۋ قورىتىندىسى بويىنشا 11- ورىندا.
جاكارتا تاتاميىنە شىققان دزيۋدوشىلارىمىز اسا قۋانتپادى. بەس سپورتشىنىڭ بىرەۋى عانا قولا جۇلدەگەر اتاندى. 78 كەلىدەن جوعارى سالماقتا سىنعا تۇسكەن گۇلجان يسانوۆا ۇزدىكتەر قاتارىندا.
رەگبيدەن قازاقستان ايەلدەر كومانداسىنىڭ اياق الىسى جامان ەمەس. توپتىق كەزەڭدە يندونەزيانى جەڭگەن ءبىزدىڭ سپورتشىلار شيرەك فينالدا سينگاپۋردى جەڭدى. ەندى قىتايمەن كەزدەسىپ، كىم مىقتىنى انىقتايدى.
قازىرگى بەسسايىستا باق سىناعان ەلەنا پوتاپەنكو جەتىنشى، ارداق احيدۋللايەۆا توعىزىنشى ورىندا.
ۆەلوترەكشىلەر بۇگىن جۇلدەسىز قالدى. كەيريندە پاۆەل ۆورجيەۆ 11-، سەرگەي پونوماريەۆ 12- ورىننان كورىندى. ال مەديسون باعدارلاماسى بويىنشا سۇلتانمۇرات ميراليەۆ پەن اسىلحان تۇرار تورتتىككە ەندى.
باسكەتبولدان (5x5) قازاقستان ايەلدەر كومانداسى ازيا ويىندارىن بەسىنشى ورىنمەن اياقتادى. ولار بەسىنشى ورىن ءۇشىن وتكەن ماتچتا تايلاندىقتاردى جەڭگەن بولاتىن.
بۇگىن بوكسشىلار فينال جولداماسىن ساراپقا سالدى. ءابىلحان امانقۇل (75 كەلى) مەن اسلانبەك شىمبەرگەنوۆ (69 كەلى) اقتىق سىندا ازيادا التىنىنا تالاسادى. ءابىلحاننىڭ جارتىلاي فينالداعى قارسىلاسى جاراقاتىنا بايلانىستى شارشى الاڭعا شىققان جوق. ال اسلانبەك شىمبەرگەنوۆ يوردانيالىق قارسىلاسىن ايقىن باسىمدىقپەن جەڭدى.
قازاقستاندىق سامبوشىلار بۇگىن ءۇش مەدال جەڭىپ الدى. بەيىمبەت قانجانوۆ پەن ايجان جىلقىبايەۆا قولاعا قول سوزسا، باعلان يبراگيم ازيا ويىندارىنىڭ چەمپيونى اتاندى.
31 -تامىزداعى كورسەتكىش بويىنشا قازاقستان قورجىنىندا 64 مەدال بار. 12 التىن، 11 كۇمىس جانە 41 قولا جۇلدە. جالپى كوماندالىق ەسەپتە ءبىز 11- ورىننان 9- ورىنعا كوتەرىلدىك.
