07:43, 20 - تامىز 2018 | GMT +6
ازيادا-2018: قازاقستان قورجىنىنا العاشقى التىن جۇلدە ءتۇستى
استانا. قازاقپارات - يندونەزيادا ءوتىپ جاتقان جازعى ازيا ويىندارىندا قازاقستان قورجىنىنا العاشقى التىن جۇلدە ءتۇستى، دەپ حابارلايدى قازاقپارات ءتىلشىسى.
ق ر ۇ و ك باسپا ءسوز قىزمەتى ءمالىم ەتكەندەي، شپاگاشى دميتري الەكسانين ازيا ويىندارىنىڭ چەمپيونى اتانىپ، ەل قورجىنىنا العاشقى التىن مەدالدى سىيلادى. ول فينالدىق باسەكەدە ريو وليمپياداسىنىڭ چەمپيونى سان ەن پاكتى جەڭدى. دميتريي ءۇش كەزەڭ بويى ەسەپتە الدا تۇردى. دەسە دە، سوڭعى كەزەڭدە وليمپيادا چەمپيونى ءبىزدىڭ سپورتشىنى قۋىپ جەتكەن بولاتىن.
سوڭعى سەكۋندتاردا ءساتتى شابۋىل جاساعان الەكسانين قارسىلاسىن قاپى قالدىرىپ، ازيادانىڭ چەمپيونى اتاندى. قورىتىندى ەسەپ - 15:12.
ايتا كەتەيىك، جارتىلاي فينالدا الەكسانين لوندون وليمپياداسىنىڭ قولا جۇلدەگەرى، ازيا ويىندارىنىڭ ءتورت دۇركىن چەمپيونى دجۋنگ دجينسۋننان باسىم تۇسكەن بولاتىن.
اۆتور: كۇنسۇلتان وتارباي