ارمي-2018: قازاقستاندىق اسكەري اسپازدار ۇزدىكتەر قاتارىنان كورىندى

قر قورعانىس مينيسترلىگى باسپا ءسوز قىزمەتىنىڭ حابارلاۋىنشا، قازاقستاندىق كوماندا «دالالىق اسكەري اسحانا» (پوليەۆايا كۋحنيا) كونكۋرسىندا ەركىن رەتسەپتىمەن اس دايىنداۋ بويىنشا رەسەي، ارمەنيا، ۆەتنام، يزرايل جانە وزبەكستانمەن ءبىر توپتا سايىسقا ءتۇستى.
جارىسقا قاتىسۋشىلارعا شەكتەۋلى كولەمدە ازىق-تۇلىك بەرىلدى، سول ازىق-تۇلىكتەردەن قازاقستاندىق اسكەري اسپازدار قۋىرداق، كەسپە، گرەك سالاتى جانە مورس ازىرلەدى. ازىرلەنگەن تاعامداردىڭ ساپاسى مەن دامدىلىگىنە بارلىق قاتىسۋشى ەلدەردىڭ وكىلدەرىنەن قۇرالعان ارنايى كوميسسيا باعا بەردى.
تاعامدار ورگانوليپتيكالىق قاسيەتتەرى بويىنشا باعالاندى، ياعني ءدامى، ءيىسى جانە اسەمدەۋىنە قاراي. جارىستىڭ ناتيجەسىندە قازاقستاندىق كوماندا رەسەي مەن يزرايلدى العا جىبەرىپ، 3-ورىندى يەلەندى. بۇدان بولەك قازاقستاندىق اسكەري اسپازدار كونكۋرس كوميسسياسى انىقتاپ بەرگەن مازىرگە ساي نان-توقاش ونىمدەرىن ءپىسىرۋ سايىسىنا قاتىسادى.
ايتا كەتەيىك، «ارمي-2018» حالىقارالىق اسكەري ويىندار جارىسى اياسىندا وتكەن اسپازدار كونكۋرسىنا قازاقستان، وزبەكستان، قىتاي، موڭعوليا، رەسەي، ارمەنيا، ازەربايجان، بەلارۋس، ۆەتنام، يزرايل، انگولا جانە ەگيپەت ەلدەرى قاتىسۋدا.