08:31, 26 - شىلدە 2018 | GMT +5
قازاقستان تۇڭعىش رەت بالالارعا ارنالعان «ەۆروۆيدەنيە-2018» ءان بايقاۋىنا قاتىسادى
استانا. قازاقپارات - قازاقستان تۇڭعىش رەت بالالارعا ارنالعان «ەۆروۆيدەنيە-2018» ءان بايقاۋىنا قاتىسادى، دەپ حابارلايدى قازاقپارات حابار 24.kz سايتىنا سىلتەمە جاساپ.
«حابار» ارناسى بالالار اراسىندا وتەتىن «ەۆروۆيدەنيە-2018» ءان بايقاۋىن كورسەتۋ قۇقىعىنا يە بولدى. ايتا كەتەيىك، بۇل حالىقارالىق شاراعا قازاقستان العاش رەت قاتىسقالى وتىر. ماماندار بيىلعى ونەر جارىسى الدىڭعى جىلدارمەن سالىستىرعاندا قىزىقتى وتەدى دەپ بولجايدى.
سەبەبى، بايقاۋعا 19 مەملەكەت قاتىساتىنىن راستادى. بۇل - بالالار «ەۆروۆيدەنيەسى» تاريحىنداعى ەڭ جوعارى كورسەتكىش.
ەسكە سالايىق، بيىل ونەر دوداسى 25- قاراشا كۇنى بەلارۋس استاناسى مينسكىدە وتەدى. وعان 9 بەن 14 جاس ارالىعىنداعى جاس انشىلەر قاتىسادى.
