بيىل 2018 -جىلى قازاقستاندا زەينەتاقى مولشەرى قانشا تەڭگەگە ارتادى
«قازاقستان رەسپۋبليكاسىنىڭ «2018-2020 -جىلدارعا ارنالعان رەسپۋبليكالىق بيۋدجەتى تۋرالى» زاڭىنا سايكەس، 2018 -جىلدىڭ 1 -قاڭتارىنان باستاپ مولشەرى ەڭ تومەن زەينەتاقى 33745 تەڭگەنى، ال بازالىق زەينەتاقى 15274 تەڭگەنى قۇرايتىن بولادى. ەڭبەك ەتكەن جىلدارى مەن جاسى بويىنشا 2018 -جىلدان باستاپ زەينەتاقى كولەمى 8 پايىزعا ارتادى»، - دەپ حابارلايدى «قازاقپارات» ح ا ا ءتىلشىسىنىڭ رەسمي ساۋال حاتىنا جاۋاپ بەرگەن مينيسترلىكتىڭ باسپا ءسوز قىزمەتىنەن.
وسىلايشا، 2018 -جىلدىڭ 2 -قاڭتارىنان باستاپ، بازالىق زەينەتاقىنى قوسقاندا مينيمالدى زەينەتاقىنىڭ مولشەرى 49019 تەڭگە بولماق. بۇل زەينەتاقى قازىرگى ۋاقىتتا ەلىمىزدە زەينەت جاسىندا وتىرعان 2 ميلليون زەينەتكەرگە بەرىلەدى. كەلەر جىلى ەنگىزەتىن جاڭالىقتاردىڭ تاعى ءبىرى - 2018 -جىلدىڭ 1 -شىلدەسىنەن باستاپ زەينەتاقى جۇيەسىندە قاتىسۋىنا قاراي بازالىق زەينەتاقى جاڭا ادىسپەن ەسەپتەلمەك.
«ناقتىراق ايتقاندا، ەگەر ەڭبەك ءوتىلى 10 جىل نەمەسە ودان دا كوپ بولسا، بازالىق زەينەتاقى ەڭ تومەنگى كۇنكورىس دەڭگەيىنەن 54 پايىزعا ارتىق بولادى. 10 جىلدىڭ ۇستىنەن ءار جىل سايىن ونىڭ مولشەرى 2 پايىزعا كوبەيىپ وتىرادى. ال ەڭبەك ءوتىلى 33 جىلدان اسسا، زەينەتكەرگە ەڭ تومەنگى كۇنكورىس دەڭگەيىنىڭ 100 پايىزدىق مولشەرى بەرىلەدى. وسىعان بايلانىستى، بارلىق زەينەتكەرلەر ءۇشىن 2018 -جىلدىڭ 1 -شىلدەسىنەن باستاپ بازالىق زەينەتاقىنى ءبىر جولعى قايتا ەسەپتەۋ جۇرگىزىلەدى. ونىڭ قورىتىندىسى بويىنشا زەينەتكەرلەردىڭ 44,1 پايىزى ەڭ تومەنگى كۇنكورىس دەڭگەيىنىڭ 100 پايىزدىق مولشەرىن، ال 44,5 پايىزى 74-تەن 100 پايىزدىق مولشەرىن الاتىن بولادى دەپ كۇتىلۋدە»، - دەپ تۇسىندىرەدى مينيسترلىكتەن.
ۆەدومستۆونىڭ ءتۇسىندىرۋى بويىنشا، بۇل ءادىس الەۋمەتتىك ادىلەتتىلىكتى قامتاماسىز ەتىپ، ادام نەعۇرلىم كوپ ەڭبەك ەتكەن سايىن وعان سوعۇرلىم كوبىرەك اقشا بەرىلەتىن بولادى. بۇل قازىرگى جانە كەلەشەكتە زەينەتكەرلىككە شىعاتىن بارلىق ادامدارعا قاتىستى بولادى.
