ەلىمىزدە 2018 -جىلعا قاراي جۇمىس ىستەيتىن ادام تابۋ قيىنداۋى مۇمكىن
ق ر د س ا د م «جۇمىسپەن قامتۋ پروبلەمالارى جونىندەگى اقپاراتتىق- ساراپتاما ورتالىعى» ا ق مالىمەتىنشە، رەسپۋبليكا تۇرعىندارىنىڭ بولجالدى سانىنا سايكەس 2018 -جىلعا دەيىنگى كەزەڭدە ەڭبەككە قابىلەتتى جاستاعى تۇرعىندار سانىنىڭ ءوسىمى الدىڭعى جىلدارعا قاراعاندا ەداۋىر تومەن بولادى. باستى سەبەپ ت م د ەلدەرىندە، ونىڭ ىشىندە قازاقستاندا 1990 -جىلدارى بولعان دەموگرافيالىق قۇلدىراۋ بولىپ وتىر.
«ول كەزدە ەكونوميكادا بولعان داعدارىستىق كورىنىستەر 21 -عاسىردىڭ باسىنا دەيىن تۋۋ كورسەتكىشتەرىنە كەرى اسەرىن تيگىزدى. ساراپشىلار سوڭعى جىلدارى ەڭبەككە قابىلەتتى جاستاعى تۇرعىندار سانىنىڭ ءوسىمى بىرتىندەپ تومەندەپ كەلە جاتقانىن ايتادى. مىسالى، بيىلعى ءوسىم - 0,2 پايىز، كەلەسى جىلى - 0,14 پايىز، 2017 -جىلى - 0,08 پايىز، ال 2018 -جىلى ەڭ تومەن كورسەتكىش 0,03 پايىز بولادى»، - دەلىنگەن حابارلامادا.
مامانداردىڭ سوزىنە قاراعاندا، بۇل ۇردىستەردىڭ نەگىزگى سەبەپتەرى مىنادا: 16-24 جاس ارالىعىنداعى جاستاردىڭ بيىلعى سانى، ياعني 2,4 ميلليون 2018-2021 -جىلدارى 2,1 ميلليونعا دەيىن ازايادى. بولجامعا سايكەس، جاستاردىڭ سانى 2015 -جىلعى دەڭگەيگە تەك 2025 -جىلى جەتەدى.
سونىمەن قاتار، ماماندار زەينەتكەرلىك جاستاعى تۇرعىندار سانى بيىل 1,6 ميلليون بولسا، 2018 -جىلى 2,1 ميلليونعا جەتەدى دەپ وتىر. ساراپشىلاردىڭ بولجامىنشا، بولاشاقتا زەينەتكەرلىك جاستاعى ازاماتتار سانى (زەينەتكەرلىككە شىعاتىن قازىرگى جاستى ەسەپكە العاندا) ارتىپ، قازاقستان تۇرعىندارىنىڭ جيىنتىق سانى قازىرگى 10,6 پايىزدان 2030 -جىلى 14 پايىزعا جانە 2050 -جىلى 15,6 پايىزعا جەتەدى.
«ياعني، الداعى جىلدارى رەسپۋبليكا ەكونوميكاسىنىڭ دامۋىن ەسەپكە الا وتىرىپ، جۇمىس بەرۋشىلەر جاڭا جۇمىسكەرلەردى جالداۋدا پروبلەماعا تاپ بولۋى مۇمكىن. ەكىنشى جاعىنان، جۇمىسسىزدىق دەڭگەيى ءارى قاراي تومەندەۋى ءتيىس. رەسمي مالىمەت بويىنشا، 2014 -جىلى جۇمىسسىزدار سانى 451 مىڭ ادام بولدى، ونىڭ ىشىندە 26 پايىزى ەشقانداي جۇمىس تابا الماعاندارىن ايتقان»، - دەلىنگەن مينيسترلىكتىڭ حابارلاماسىندا.
