قازاقستاندا 2017-جىلى قانداي كىتاپتار جارىق كوردى؟
تانىمال كىتاپتار تىزىمىنە قاراپ، قازاقستاندىق وقىرمانداردىڭ اۆتوبيوگرافيا مەن ەستەلىكتەردى ءسۇيىپ وقيتىنىن بايقاۋعا بولادى.
«وتكەن جىلدىڭ باستى كىتابى - بايان ەسەنتايەۆانىڭ اۆتوبيوگرافياسى بولدى. «وبو منە ي نە تولكو» تۋىندىسى ارقىلى قازاقستاندىق وقىرماندار العاش رەت پروديۋسەر ومىرىندەگى كەلەڭسىز جايتتىڭ انىق-قانىعىن ءبىلدى. كىتاپ قازاق جانە ورىس تىلدەرىندە جارىق كورىپ، ەڭ كوپ تالقىلانعان جانە ەڭ كوپ ساتىلعان جيناققا اينالدى. سوندىقتان دا بۇل كىتاپ ءبىزدىڭ تىزىمدە كوش باستادى»، - دەلىنگەن «مەلومان» كىتاپ دۇكەنىنىڭ رەسمي سايتىندا.
ەكىنشى ورىندا كينورەجيسسەر، سەناريست جانە جازۋشى ەرمەك تۇرسىنوۆتىڭ «مەلوچي جيزني» كىتابى تۇر. بۇل - ەرمەك تۇرسىنوۆتىڭ 16-كىتابى جانە العاشقى اۆتوبيوگرافياسى. مۇندا وقىرمان تانىمال رەجيسسەردىڭ بالالىق شاعىنان باستاپ، رەجيسسەرلىك كاسىبىنە دەيىنگى جولىمەن تانىسا الادى. جىل سوڭىندا ەرمەك تۇرسىنوۆ العاشقى اۆتوبيوگرافياسىنىڭ جالعاسىن - «جيلي-بىلي» كىتابىن جارىققا شىعاردى.
2016-جىلى 14-ورىندا تۇرعان ابايدىڭ «قارا سوزدەرى» وتكەن جىلى كوبىرەك ساتىلىپ، ءۇشىنشى قاتارعا كوتەرىلگەن. مۇندا ۇلى اقىننىڭ ۇلتتىق تاربيە، دۇنيەتانىم، تاريح ماسەلەسى كوتەرىلەتىن عيبراتقا تولى 45 قارا ءسوزى جيناقتالعان.
ءتورتىنشى ورىندا ءمادينا بايبولوۆانىڭ «تۇرمىستاعى ايەل كىتابى» تۇر. مۇندا اۆتوردىڭ تۇرمىستىق ومىردەن تۇيگەن ويلارى، وتباسىنىڭ بەرىكتىگىن نىعايتۋعا ارنالعان اقىل-كەڭەستەرى جازىلعان جانە قازاقستاندىق قىز-كەلىنشەكتەر بۇل كىتاپتى كوپتەپ ساتىپ العان. 2016-جىلى كىتاپ ساتىلىمىندا كوش باستاعان ءلايلا سۇلتان قىزىنىڭ «ەكىنشى كىتابى» بيىل بەسىنشى ورىنعا سىرعىعان. وندا تانىمال تەلەجۇرگىزۋشىنىڭ جەتىستىككە جەتۋ جولدارى باياندالعان.
التىنشى ورىندا كاسىبي جۋرناليست، Petroleum جۋرنالىنىڭ باس رەداكتورى ولەگ چەرۆينسكيدىڭ «چەرنايا كروۆ كازاحستانا. نەفتيانايا يستوريا نەزاۆيسيموستي» كىتابى تۇر. كىتاپقا تاۋەلسىز قازاقستانداعى مۇناي-گاز سالاسىنىڭ دامۋى تۋرالى قىزىقتى دەرەكتەر، ماقالالار سەرياسى مەن سۇحباتتارى ەنگەن. جەتىنشى ورىنعا قازاقستاندىق جۋرناليست ۆاديم بورەيكونىڭ «ۆيسوكوسنىي.kz» كىتابى، سەگىزىنشى ورىنعا - كاسىپكەر سەرىكباي بيسەكەيەۆتىڭ «تابىس كۇندەلىگى» جايعاسقان.
سونىمەن بىرگە، مۇستافا شوقايدىڭ بيىل قايتا باسىلىپ شىققان «تۋركەستان پود ۆلاستيۋ سوۆەتوۆ» كىتابى دا ەڭ كوپ ساتىلعان وتاندىق كىتاپتار قاتارىنان كورىندى. ءبىر كەزدەرى ك س ر و اۋماعىندا وقۋعا تىيىم سالىنعان بۇل كىتاپتا مۇستافا شوقاي كەڭەستىك رەسمي قۇجاتتارعا، گازەت-جۋرنالدارعا تالداۋ جاساپ، تۇركىستانداعى جاعدايعا، وكتيابر ريەۆوليۋتسياسىنىڭ سالدارىنا ءادىل باعا بەرەدى. كىتاپ 1935-جىلى پاريجدە ورىس تىلىندە جارىق كورگەن العاشقى نۇسقاسى نەگىزىندە قايتا باسىلدى.
ەڭ كوپ ساتىلعان 18 قازاقستاندىق كىتاپ قاتارىنا ينستاگرامداعى تانىمال انا اسەل ساپاقوۆانىڭ «گوۆوريم س دەتمي نا كازاحسكوم» (10- ورىن)، دانا ورمانبايەۆانىڭ «يستوريا ۋسپەشنوگو مەنەدجەرا - «كليۋچي وت كەيسا» (11- ورىن)، سەيداحمەت قۇتتى قادامنىڭ «سلۋجەنيە ناتسي: 10 ميروۆىح پريمەروۆ ۋپراۆلەنيا گوسۋدارستۆوم» (12- ورىن)، سۇلتان اكىمبەكوۆتىڭ «يستوريا ستەپەي: فەنومەن گوسۋدارستۆا چينگيسحانا ۆ يستوريي ەۆرازيي» (13- ورىن)، تۇرىسبەك ساۋكەتايەۆتىڭ «مەن - جىندىمىن» (14- ورىن)، ەرمەك تۇرسىنوۆتىڭ تاعى ءبىر كىتابى «ماملۇك» (15- ورىن)، ءىلياس ەسەنبەرليننىڭ «كوشپەندىلەر» (16- ورىن)، زيرا ناۋرزبايەۆانىڭ «چەتىرە وبلاكا» (17- ورىن) جانە گەرولد بەلگەردىڭ «پلەتەنە چەپۋحي» (18- ورىن) كۇندەلىك-كىتابى ەندى.
«مەلومان» - 1987-جىلى وسكەمەن قالاسىندا قۇرىلعان اۋديو جانە ۆيدەو ونىمدەر، كىتاپتار مەن تۇرمىستىق ەلەكترونيكا تاۋارلارىن ساتاتىن ءىرى دۇكەندەر جەلىسى. بۇگىندە مەلومان دۇكەنىن قازاقستاننىڭ بارلىق وڭىرىنەن كەزىكتىرۋگە بولادى.
اۆتور: ايجان سەرىكجان قىزى
