ۋنيۆەرسيادا-2017: ەستافەتادان قازاقستان ايەلدەر قۇراماسى التىن مەدالىنەن ايىرىلىپ قالدى

استانا. قازاقپارات - قىتايدىڭ تايبەي قالاسىندا ءوتىپ جاتقان جازعى ۋنيۆەرسيادا ويىندارىندا قازاقستان ايەلدەر قۇراماسى ەستافەتادان جەڭىپ العان التىن مەدالىنەن ايىرىلىپ قالدى، دەپ حابارلايدى قازاقپارات ءتىلشىسى.

وسىعان دەيىن حابارلاعانىمىزداي، 4x100 مەترگە ەستافەتاعا جۇگىرۋدە ەل نامىسىن ريمما كاشافۋتدينوۆا، ۆيكتوريا زيابكينا، سۆەتلانا گولەندوۆا جانە ولگا سافرونوۆا قورعاپ، ۋنيۆەرسيادا چەمپيونى اتانعان بولاتىن.

جەڭىمپازدارعا مەدالدار تابىستالىپ، شامالى ۋاقىت وتكەننەن كەيىن قازاقستاندىق سپورتشىلاردىڭ جارىس بارىسىندا ەرەجە بۇزعانى انىقتالىپ، مەدالدارىن قايتارۋعا تۋرا كەلدى.

قازاقستاننان باسقا يتاليا قۇراماسى دا مەدالدارىنان ايىرىلىپ قالدى. ەندى التىن مەدال شۆەيتساريا كومانداسىنا، كۇمىس مەدال پولشاعا، ال قولا جاپونيا قۇراماسىنا تيەسىلى بولماق.

ەستەرىڭىزگە سالا كەتەيىك، بۇعان دەيىن جارىس قورىتىندىسى بويىنشا وتانداستارىمىز 43.68 سەكۋند ناتيجەمەن ەل قورجىنىنا التىن مەدال سالدى دەپ حابارلانعان بولاتىن. شۆەيتساريا (43.81 سەكۋند) جانە پولشا (44.19 سەكۋند) اتلەتتەرى ەكىنشى جانە ءۇشىنشى ورىندى ءوزارا بولىسكەن ەدى.

اۆتور: كۇنسۇلتان وتارباي