ۋنيۆەرسيادا-2017: ءۇش جەڭىل اتلەتىمىز فينالدا ونەر كورسەتەدى

استانا. قازاقپارات - تايبەيدە ءوتىپ جاتقان جازعى بۇكىل الەمدىك ۋنيۆەرسيادا ويىندارىندا ءۇش جەڭىل اتلەتىمىز فينالدا ونەر كورسەتەدى، دەپ حابارلايدى قازاقپارات ءتىلشىسى.

ونىڭ ءبىرى ايەلدەر اراسىندا ءۇش قارعىپ سەكىرۋدەن قاتىسقان ماريا وۆچيننيكوۆا بولسا، ەكەۋى سىرىقپەن سەكىرۋشى سەرگەي گريگوريەۆ پەن نيكيتا فيليپپوۆتار.

ق ر جەڭىل اتلەتيكا فەدەراتسياسىنىڭ باسپا ءسوز قىزمەتىنىڭ مالىمەتىنشە، بۇگىن تاڭعى باعدارلامادا ماريا 13,35 مەترگە سەكىرىپ، ىرىكتەۋ كەزەڭىن ءساتتى اياقتادى. قاراعاندىلىق اتلەتتىڭ الدىن تەك نەمىس قىزى نيلي ەكحاردت وراپ كەتتى (13,52 مەتر). فينالدىق كەزەڭ 27 تامىزدا استانا ۋاقىتى بويىنا ساعات 16:20 دا باستالادى. شەشۋى باسەكەدە 12 اتلەت ونەر كورسەتەدى. سونداي-اق سىرىقپەن سەكىرۋشى سەرگەي گريگوريەۆ پەن نيكيتا فيليپپوۆ تە فينالعا ءوتتى.

بۇل سايىس تۇرىندە بارلىعى 22 قاتىسۋشى بولدى. ونىڭ ىشىندە فينالعا 12 سپورتشى جولداما الدى. سىرىقپەن سەكىرۋشىلەردىڭ فينالى دا 27- تامىزعا جوسپارلانعان. باستالۋى - استانا ۋاقىتى بويىنشا - 16:00 دە.

اۆتور: كۇنسۇلتان وتارباي