قىتاي ەكسپو-2017 كورمەسىنە ءوز پاۆيلونىن تانىستىردى

بەيجىڭ. قازاقپارات - بۇگىن قىتاي حالىقارالىق ساۋداعا جاردەمدەسۋ كوميتەتى ق ح ر ەكسپو كورمەسىنە قاتىسۋىنا ارنالعان باسپا ءسوز ءماسليحاتىن وتكىزدى، دەپ حابارلادى قىتايداعى «قازاقپارات» ح ا ا ءتىلشىسى.

قىتاي تاراپىنىڭ شاقىرتۋىمەن شاراعا قىتايداعى قازاقستان ەلشىسى شارحات نۇرىشيەۆ قاتىستى.

 «قىتاي الەمدەگى ەكونوميكا جاعىنان ەكىنشى، ءىرى ەنەرگيا ءوندىرۋشى، تۇتىنۋشى بولا تۇرا، استاناداعى ەكسپو-2017 كورمەسىن ەنەرگەتيكا سالاسىنداعى قىتايدىڭ وزىق تەحنولوگيالار مەن ستراتەگياسىن جان- جاقتى كورسەتۋ، قازاقستان مەن باسقا ەلدەر تاجىريبەسىمەن الماسۋ، سونداي- اق جاۋاپتى دەرجاۆا رەتىندە قىتايدىڭ يميدجىن كورسەتۋ ءۇشىن پلاتفورما رەتىندە قاراستىرادى»، - دەدى كوميتەت ءتوراعاسىنىڭ ورىنباسارى، قىتاي پاۆيلونىنىڭ ۇلتتىق كوميسسارى، قىتاي ۇكىمەتىنىڭ وكىلى ۆان تسزينچجەن.

اۋماعى 1 مىڭ شارشى مەتر قىتايلىق پاۆيلوننىڭ لەيتموتيۆى «بولاشاق ەنەرگياسى، جاسىل جىبەك جولى» بولماق، وعان ءۇش ماعىنالى سيۋجەت ۇسىنىلادى: قىتايلىق ەنەرگەتيكانىڭ وتكەنى، قازىرگىسى، بولاشاعى.

ۆان تسزينچجەن كورمە كەزىندە قىتايلىق پوليگوندا كوپتەگەن شارالار وتكىزىلەتىنىن حابارلادى. ونىڭ ىشىندە ەنەرگەتيكالىق جانە تۋريستىك سالالاردا ق ر مەن ق ح ر ىنتىماقتاستىق فورۋمدارى، تەرراكوتا اسكەرىنىڭ كورمەسى جانە باسقا دا مادەني، ىسكەرلىك شارالار وتەدى.

قىتايدىڭ 24 ءوڭىرى پاۆيلون اياسىندا تاقىرىپتىق كۇندەر وتكىزەدى.

قىتاي پاۆيلونىنىڭ اقپاراتتىق ارىپتەستەرى «شينحۋا»، «رىن مين رى باۋ»، قىتاي حالىقارالىق راديوسى، China Daily «رىن مين حۋا باۋ» جانە باسقا دا ق ح ر  ب ا ق- تارى.

 بالامالى ەنەرگەتيكا سالاسىنداعى جەتىستىكتەرىن ق ح ر ونداعان ءىرى ەنەرگەتيكالىق كومپانيالارى كورسەتەدى.

2017 -جىلعى قاڭتاردا قىتاي كورمەدەگى ءوز پاۆيلونى اۋماعىنداعى ارلەۋ جۇمىستارىنا كىرىسىپ، www.expochina2017.org. رەسمي سايتىن اشتى.