ۋنيۆەرسيادا-2017: مانەرلەپ سىرعاناۋدان قازاقستان قۇراماسى انىقتالدى
قازاقستاننىڭ مانەرلەپ سىرعاناۋ بويىنشا قۇراماسىنىڭ باس باپكەرى قۇرالاي ءۇزىروۆا الماتىداعى دۇنيەجۇزىلىك ۋنيۆەرسياداعا قاتىساتىن قۇرامانىڭ ءتىزىمىن بەكىتتى.
ەرلەر كومانداسىنا دەنيس تەن، ابزال راقىمعاليەۆ جانە ارتۋر پانيحين كىرگەن بولسا، ايەلدەر اراسىنداعى سايىستاردا قازاقستان نامىسىن ايزا يمانبەك، ۆەرونيكا شيەۆەليەۆا جانە جانسايا ءادىحانوۆا قورعايتىن بولادى.
سوچي وليمپياداسىندا قولا جۇلدەگەر اتانعان دەنيس تەن الماتىداعى قىسقى ۋنيۆەرسيادا كەزىندە ەرلەر اراسىنداعى جەكە مانەرلەپ سىرعاناۋ جارىسىنىڭ باستى فاۆوريتتەرىنىڭ ءبىرى بولماق.
الايدا ايەلدەر كومانداسىنا مەدال ءۇشىن كۇرەس قيىنعا سوقپاق. «ايەلدەر كومانداسىنا جاس قىزدار كىرىپ وتىر ولاردىڭ بارلىعىنىڭ ويىنىندا وزدەرىنە ءتان تارتىمدى تۇستارى بار، الار بيىكتەرى ءالى الدا. ەڭ باستىسى، ولار ەل اتىنان بارىنشا جوعارى دەڭگەيدە ونەر كورسەتسە دەيمىن. ايزا يمانبەك العاشقى وندىقتار تىزىمىنە كىرگەنىن قالايمىن. جاقسىلاپ كۇشىن سالىپ، قوبالجۋىن باسىپ، ءوز ءبيىن تازا ورىنداپ شىعا الاتىن بولسا، ونىڭ قولىنان بۇل كەلەدى. ءبىزدىڭ ايەلدەر قۇراماسىنىڭ ويىنى بارلىعىنىڭ كوڭىلىنەن شىعادى دەپ ۇمىتتەنەمىز»، - دەدى قۇرالاي ءۇزىروۆا.
جاس مانەرلەپ سىرعاناۋشى ۆەرونيكا شيەۆەليەۆا: «ۋنيۆەرسياداعا قاتىساتىنىمدى ەستىگەندە وتە قاتتى قۋانىپ كەتتىم. وسىنداي دەڭگەيدەگى جارىسقا قاتىسۋ مەن ءۇشىن ۇلكەن قۇرمەت. ءوز كۇشىمە سەنىممەن قارايمىن. بىلەتىنىمنىڭ ءبارىن كورسەتە الامىن دەپ ويلايمىن. قازىر مۇمكىندىگىنشە كوبىرەك جاتتىعۋعا تىرىسىپ ءجۇرمىز، كۇن سايىن 3-4 ساعات مۇزدا جاتتىعۋدامىز»، - دەپ اتاپ ءوتتى.
ەستەرىڭىزگە سالا كەتەيىك، قىسقى ۋنيۆەرسيادانىڭ بۇكىل تاريحىندا قازاقستاندىق مانەرلەپ سىرعاناۋشىلار ەكى مەدال جەڭىپ العان. 1995-جىلى يسپانيانىڭ حاكاسىندا مارينا حالتۋرينا جانە اندرەي كريۋكوۆ جۇپتىق ويىندا التىن جەڭىپ العان بولسا، دميتري كازارلىگا جانە ەليزاۆەتا ستەكولنيكوۆا ەلىمىزگە قولا مەدالداردى سىيلادى.
اۆتور: كۇنسۇلتان وتارباي
