قازاقستاندا 2017-جىلى وتەتىن باستى شارالار
قازاقپارات كەلەر جىلى ەلىمىزدە بولاتىن باستى وقيعالار ءتىزىمىن نازارلارىڭىزعا ۇسىنادى.
28- قىسقى ۋنيۆەرسيادا
شامامەن ءبىر ايدان كەيىن الماتى قالاسىندا 28-دۇنيەجۇزىلىك قىسقى ۋنيۆەرسيادا ويىندارى باستالادى. بۇكىل الەمدىك ستۋدەنتتەر ويىنىنا 2 مىڭعا جۋىق سپورتشى قاتىسادى جانە 3 مىڭعا جۋىق ەرىكتى جۇمىس ىستەمەك. ەرىكتىلەر اراسىندا شەتەلدىكتەر دە بار.
ۋنيۆەرسيادا باعدارلاماسىنا مانەرلەپ سىرعاناۋ، شورت-ترەك، تاۋ شاڭعىسى، شايبالى حوككەي (ەرلەر، ايەلدەر)، سنوۋبورد، بياتلون، شاڭعى جارىسى، كەرلينگ، شاڭعىمەن تۇعىردان سەكىرۋ، شاڭعى قوسسايىسى، كونكيمەن جۇگىرۋ، فريستايل سەكىلدى 12 سپورت ءتۇرى ەنەدى.
قازاقستان اتىنان دەنيس تەن، ابزال راقىمعاليەۆ، ايزا يمانبەك، گالينا ۆيشنيەۆسكايا سىندى بەلگىلى سپورتشىلار سىنعا تۇسەدى.
ۋنيۆەرسياداعا 30 مىڭ وتاندىق جانە شەتەلدىك تۋريست كەلەدى دەپ جوسپارلانعان جانە الەمنىڭ 80 ەلىنەن 1 ميلليارد كورەرمەن تەلەترانسلياتسيا ارقىلى كورە الادى.
ەكسپو-2017 كورمەسى
«بولاشاق ەنەرگياسى» تاقىرىبىمەن وتەتىن حالىقارالىق مامانداندىرىلعان ەكسپو-2017 كورمەسى 2017-جىلدىڭ 10- ماۋسىم - 10- قىركۇيەك ارالىعىندا استانا قالاسىندا وتەدى.
كورمەگە 5 ميلليون تۋريست كەلەدى دەپ كۇتىلۋدە. كورمە بيلەتتەرىنىڭ قۇنى 6 مىڭ تەڭگەدەن باستالادى. بارلىق قازاقستان بويىنشا وففلاين-كاسسالار 2016-جىلى 1- قىركۇيەكتە اشىلدى. كورمە ارقىلى ەلىمىزگە ءىرى ينۆەستيتسيالار تارتۋ جانە رەسپۋبليكامىزدىڭ ەكونوميكالىق جانە ينفراقۇرىلىمدىق دامۋىن قوسىمشا ىنتالاندىرۋ مۇمكىندىگى ارتادى.
ەكسپو قالاشىعى مەن ءتۇرلى جوبا نىساندارى كورمە اياقتالعاننان كەيىن دە، قالا تۇرعىندارى مەن قوناقتارى ءۇشىن قىزمەت ەتەتىن بولادى. جوبا بارىسىندا قوناق ءۇي رەتىندە سوعىلعان كوپ قاباتتى عيماراتتار قالا اكىمدىگىنە ءوتىپ، تۇرعىن ۇيلەردىڭ قاتارىن تولىقتىرادى.
سول ارقىلى قالالىق اكىمدىك تۇرعىن ءۇي ماسەلەسىن وڭتايلاندىرۋدى كوزدەپ وتىر.
ش ى ۇ- عا قازاقستاننىڭ ءتوراعالىق ەتۋى
2016-جىلدىڭ 24- ماۋسىمنان 2017-جىلدىڭ 8-9- ماۋسىمىنا دەيىن شاڭحاي ىنتىماقتاستىق ۇيىمىنا قازاقستان ءتوراعالىق ەتەدى جانە ماۋسىم ايىندا ش ى ۇ- نىڭ كەزەكتى سامميتى استانا قالاسىندا وتەدى.
ق ر پرەزيدەنتى نۇرسۇلتان نازاربايەۆ وڭىرلىك قاۋىپسىزدىكتى قامتاماسىز ەتۋ، ەكونوميكالىق قارىم-قاتىناستى نىعايتۋ، كولىكتىك-ترانزيتتىك الەۋەتتى كەڭەيتۋ جانە مادەني-گۋمانيتارلىق ىقپالداستىقتى العا جىلجىتۋ ماسەلەلەرىن قازاقستاننىڭ ش ى ۇ- عا ءتوراعالىعىنىڭ باسىمدىقتارى رەتىندە اتاپ ءوتتى. شانحاي ىنتىماقتاستىق ۇيىمى 2001-جىلى التى مەملەكەتتىڭ باستاماسىمەن قۇرىلدى. كەلەر جىلى استانادا وتەتىن سامميتتە ءۇندىستان مەن پاكىستاندى ۇيىم مۇشەلىگىنە قابىلداۋ ماسەلەسى تالقىلانادى.
ب ۇ ۇ قاۋىپسىزدىك كەڭەسى
بيىل ماۋسىم ايىنىڭ 28 ىندە قازاقستان ازيا توبى مەملەكەتتەرىنىڭ اتىنان 2017-2018-جىلدارعا بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. نيۋ- يوركتەگى ب ۇ ۇ باس اسسامبلەياسىندا وتكەن داۋىس بەرۋدىڭ ناتيجەسىندە 138 مەملەكەت قازاقستاننىڭ كانديداتۋراسىن قولدادى.
ال قازاقستاندىق ءوتىنىمنىڭ جالعىز باسەكەلەسى - تايلاند كورولدىگى ءۇشىن 50 دەن استام مەملەكەت داۋىس بەرگەن ەدى. ق ر سىرتقى ىستەر ءمينيسترى ەرلان ىدىرىسوۆتىڭ ايتۋىنشا، قازاقستاننىڭ ب ۇ ۇ قاۋىپسىزدىك كەڭەسىنە سايلانۋى ايماقتىڭ شيەلەنىستى جاعدايلارىنا الەمدىك قاۋىمداستىقتىڭ نازارىن اۋدارۋعا، مەملەكەتتىڭ حالىقارالىق باستامالارىن ىسكە اسىرۋعا، استانانىڭ جاھاندىق ماسەلەلەردە ماڭىزدى ءرول اتقارىپ، «ەۋرازيا كەڭىستىگىندەگى قاۋىپسىزدىك پەن تۇراقتىلىق فاكتورى» رەتىندە قازاقستاننىڭ يميدجىن كوتەرۋگە سەبەپ بولماق.
بۇۇ قاۋىپسىزدىك كەڭەسىنە 15 مەملەكەت مۇشە بولادى. ولاردىڭ بەسەۋى تۇراقتى: ا ق ش، قىتاي، رەسەي، ۇلى بريتانيا جانە فرانسيا. ال قالعان ون تۇراقتى ەمەس مۇشەسى ب ۇ ۇ باس اسسامبلەياسى ارقىلى ەكى جىلدىق مەرزىمگە سايلانىپ وتىرادى. قازاقستان بۇعان دەيىن ازيا ەلدەرى توبىنان سايلانعان مالايزيانى الماستىراتىن بولادى.
***
كەلەر جىلى دۇنيەجۇزىلىك بوكس كەڭەسىنىڭ 55- كونۆەنتسياسى قازاقستاندا وتەدى دەپ كۇتىلۋدە. ال 7-22 -شىلدە كۇندەرى «جىبەك جولى» حالىقارالىق راللي-رەيدى قازاق دالاسىنان وتەدى. سونداي-اق، 1917-جىلى ءاليحان بوكەيحانوۆ باستاعان ۇلت زيالىلارى قۇرعان الاشوردا ۇكىمەتىنىڭ 100 جىلدىعى كەلە جاتىر.
قازاقتىڭ تۇڭعىش ۇلتتىق-بەيرەسمي باسىلىمدارى «سەركە» جانە «قازاق» گازەتتەرىنە بيىل 110 جىل تولماق. سونىمەن بىرگە، ءنازيپا قۇلجانوۆانىڭ 130 جىلدىعى، مۇحتار اۋەزوۆتىڭ 120 جىلدىعى، ءاسانالى ءاشىموۆ (80 جاس)، نۇرعالي ءنۇسىپجانوۆ (80 جاس)، سماعۇل ەلۋبايەۆ (70 جاس)، لاكي كەسوگلۋ (70 جاس)، روزا رىمبايەۆا (60 جاس) سەكىلدى ءبىرتۋار قازاق تۇلعالارى مەرەيلى جاسقا تولادى.
اۆتور: ايجان سەرىكجان قىزى
