15:02, 03 - قاراشا 2016 | GMT +5
قىتاي قازاقستانعا ەكسپو-2017 وتكىزۋگە جان- جاقتى قولداۋ بىلدىرەدى
بىشكەك. قازاقپارات - ەكسپو-2017 وتكىزۋدە قازاقستانعا قىتاي جان- جاقتى قولداۋ بىلدىرەدى. بۇل تۋرالى بۇگىن ق ح ر مەملەكەتتىك كەڭەسىنىڭ پرەمەرى لي كىشياڭ بىشكەكتەگى ش ى ۇ مۇشە مەملەكەتتەر ۇكىمەتتەرىنىڭ باسشىلار كەڭەسىنىڭ كەڭەيتىلگەن وتىرىسىندا مالىمدەدى،
دەپ حابارلايدى قازاقپاراتتىڭ بىشكەكتەگى مەنشىكتى ءتىلشىسى.
«قىتاي قازاقستاندى «ەكسپو-2017» حالىقارالىق مامانداندىرىلعان كورمەسىن وتكىزۋدە جان- جاقتى قولداۋ بىلدىرەدى. جوعارعى جانە يننوۆاتسيالىق تەحنولوگيالاردىڭ ماڭىزدى ءرولىن ەسكەرە وتىرىپ، عىلىم مەن تەحنيكا، بالامالى قۋات كوزى جانە «جاسىل» ەكونوميكا سالاسىنداعى بايلانىستاردى نىعايتۋ كەرەك»، - دەپ اتاپ ءوتتى لي كىشياڭ .
ەسكە سالا كەتسەك، بۇگىن بىشكەكتە ش ى ۇ مۇشە مەملەكەتتەرىنىڭ ۇكىمەت باسشىلارى كەڭەسىنىڭ 15- مەرەيتويلىق وتىرىسى ءوتىپ جاتىر. بۇل وتىرىس ش ى ۇ مەرەيتويلىق جىلىنداعى رەسمي شارالار كەزەڭىن اياقتايدى. بۇگىندە قازاقستان ش ى ۇ ءتوراعاسى بولىپ تابىلادى، ال 2017 -جىلدىڭ 8-9 - ماۋسىمىندا استانادا ۇيىمعا مۇشە مەملەكەتتەر باسشىلارىنىڭ سامميتى وتەدى.
