ەكسپو-2017 كورمە نىساندارىنداعى لاڭكەستىككە قارسى قولعا الىناتىن شارالار بەلگىلى بولدى
«بولۋى مۇمكىن لاڭكەستىك پەن ەكسترەميستىك قاۋىپ- قاتەرلەردىڭ الدىن الۋ ماقساتىندا كورمە نىساندارىنا لاڭكەستىك تۇرعىسىندا وسال دەگەن مارتەبە بەرىلىپ وتىر. كورمە اۋماعىندا ءدىني جاعداي جەدەل قاداعالاۋ جۇرگىزىلىپ وتىرادى، ونىڭ ۇستىنە كۇن سايىن كورمە نىساندارىندا جارىلعىش زاتتارعا، راديواكتيۆتى، حيميالىق جانە وزگە دە كومپونەتتەرى بار زاتتارعا قاتىستى تەكسەرۋ بولىپ تۇرادى»، - دەدى ق ر ءى ءى م باسپا ءسوز قىزمەتى «قازاقپارات» تىلشىسىنە بەرگەن جاۋابىندا.
ۆەدومستۆونىڭ حابارلاۋىنشا، كورمە اۋماعىنداعى وتكىزۋ پۋنكتىنىڭ جۇمىس رەجيمى قاتاڭداتىلىپ وتىر.
«كورمەگە كەلگەن ادامداردى بەت- بەينەسىنەن انىقتاۋ جۇيەسىمەن تىركەۋ جوسپارلانۋدا. ول كامەرالار ەكسپو- عا كىرەتىن بارلىق جەرلەردە ورنالاستىرىلادى. سونىمەن قاتار «پروفايلينگ» ءادىسى بويىنشا ادامدى ءجۇرىس- تۇرىسىنان كورمەنىڭ قاۋىپسىزدىگىنە قاۋىپ توندىرەتىندىگىن انىقتايتىن ارنايى «بۇركىت» اقپاراتتىق جۇيەسى ارقىلى سكانەرلەۋ كوزدەلۋدە»، - دەلىنگەن ق ر ءى ءى م جاۋابىندا.
ونىڭ ۇستىنە، ەكسپو كورمەسىن وتكىزۋ كەزىندە رەنتگەن- تەلەۆيزيالىق قۇرالدار مەن تەپلوۆيزورلار قولدانىلادى. سونداي- اق كورمە اۋماعىنا تىيىم سالىنعان زاتتاردى وتكىزبەۋ ءۇشىن موبيلدى كەشەندەر پايدالانىلادى. وندا ىشكى ىستەر جانە كەدەن ورگاندارىنىڭ قىزمەتكەرلەرى قىزمەت ەتەدى.
بيىل قازان ايىنان باستاپ، كورمەگە كەلەتىن جۇكتەردى تەكسەرۋ ءۇشىن جاڭا لوگيستيكالىق ورتالىق ىسكە قوسىلادى.
ايتا كەتۋ كەرەك، قوسىمشا قاۋىپسىزدىك شارالارى ءۇشىن كورمە كەزىندە كينولوگيالىق قىزمەت تە بەلسەندى تارتىلادى. «ءتورت اياقتى پوليتسەيلەر» كەلۋشىلەردى تەكسەرۋ كەزىندە جارىلعىش جانە ەسىرتكى زاتتارىن تىنتۋگە كومەكتەسەدى.
مينيسترلىكتەن حابارلاعانىنداي، كورمەگە دايىندىق بارىسىندا قازاقستاندىق قۇرىلىمدار ميلانداعى، قىتايداعى بۇكىل الەمدىك كورمەلەردىڭ، سوچيدەگى قىسقى وليمپيادا ويىندارىنىڭ، تۇركياداعى ەكسپو-2016 بوتانيكالىق كورمەسىنىڭ جانە قازانداعى ۋنيۆەرسيادانىڭ قاۋىپسىزدىك ساقتاۋداعى حالىقارالىق تاجىريبەلەرىمەن تانىسىپ قايتتى.
ەسكە سالا كەتەيىك، ەكسپو كورمەسى استانادا 2017 -جىلدىڭ 10- ماۋسىمىنان 10 - قىركۇيەگىنە دەيىن جالعاسادى. وعان 2 ميلليوننان استام ادام كەلەدى دەپ كۇتىلۋدە. «ەكسپو-2017» كورمەسىنىڭ تاقىرىبى - بولاشاق ەنەرگياسى».
ۇيىمداستىرۋشىلاردىڭ ايتۋىنشا، كورمەگە بۇكىل الەمنەن ەنەرگوتيىمدىلىك، بالامالى ەنەرگيا كوزدەرى سالاسىنداعى جاڭا تەحنولوگيالار اكەلىنەدى. بۇرىن حابارلاعانىمىزداي، قازاقستان ەكسپو مامانداندىرىلعان كورمەسىنە ەڭ كوپ قاتىسۋشى مەملەكەتتەردى تارتا بىلگەن ۇزدىك ءۇش ۇيىمداستىرۋشىلاردىڭ قاتارىنا ەنۋى ىقتيمال.
اۆتور: جاسۇلان جولدىبايەۆ
