21:17, 16 - قىركۇيەك 2016 | GMT +5
مايك تايسون ەكسپو-2017 كورمەسىنىڭ قۇرمەتتى قوناعى بولماقشى
استانا. قازاقپارات - استانادا 2017-جىلى وتەتىن ەكسپو كورمەسىنە مايك تايسون مەن گەننادي گولوۆكين قوناق رەتىندە شاقىرىلماقشى.
بۇل تۋرالى استانا ەكسپو -2017 كورمەسىنىڭ رەسمي سايتى حابارلادى.
«حالىقارالىق مامانداندىرىلعان كورمە استانا قالاسىندا 2017-جىلعى 10- ماۋسىمنان 10- قىركۇيەك ارالىعىندا وتەدى، ونىڭ بارىسىندا قول قويىلعان مەموراندۋم شەڭبەرىندە World Boxing Council 55 مەرەيتويلىق كونۆەنتسياسىن جانە مايك تايسون، گەننادي گولوۆكين مەن ت. ب. اتاقتى بوكسشىلاردىڭ قاتىسۋىمەن كاسىبي بوكس كەشىن وتكىزۋ جوسپارلانعانىن اتاپ كەتكىمىز كەلەدى»، - دەلىنگەن ۇلتتىق كومپانيانىڭ رەسمي سايتىندا.
ەسكە سالا كەتەيىك، گولوۆكين ەكسپو كورمەسى اياسىندا استانادا كەزدەسۋ وتكىزۋى مۇمكىن دەگەن حابار تاراعان بولاتىن. ازىرگە، وتاندىق بوكسشىنىڭ كەشكە قانداي ماقساتپەن قاتىساتىنى بەلگىسىز.
ال مايك تايسون ەكسپو كورمەسى كەزىندە قازاقستانعا ەكىنشى رەت كەلمەكشى.
