جامبىل وبلىسىنىڭ تۋريستىك باعدارلارى ەكسپو-2017 قوناقتارى باراتىن نەگىزگى باعدارلار قاتارىنا ەندى
«جىبەك جولىنىڭ تاريحي ورتالىقتارىن قايتا وركەندەتۋ، تۇركى تىلدەس مەملەكەتتەردىڭ مادەني مۇراسىن ساقتاۋ جانە ساباقتاستىرا دامىتۋ، تۋريزم ينفراقۇرىلىمىن جاساۋ» مەملەكەتتىك باعدارلاماسىنا قوسىلعان جامبىل وبلىسىنىڭ باي تۋريستىك الەۋەتى بار، ىشكى جانە حالىقارالىق تۋريزمدى دامىتۋدىڭ ۇلكەن مۇمكىندىكتەرىنە يە.
وبلىستىق اكىمدىكتىڭ حابارلاۋىنشا، ەجەلگى زامانعى ۇلى جىبەك جولى وتكەن جامبىل ءوڭىرى شەتەلدىك قوناقتارعا «ەجەلگى تاراز قازىنالارى» ، «اقىرتاس سىرلارى» ، «اقسۋ- جاباعىلى» ، «ۇلى جىبەك جولى بويىمەن» ، «ەجەلگى تاراز بۇگىنگى زاماندا» ، «قار شىڭىنان بارحان قۇمىنا دەيىن» جانە باسقا دا تۋريستىك باعدارلاردى ۇسىنادى.
ۇلى جىبەك جولىنىڭ جامبىل اۋماعىنداعى بولىگىندە (سايرام - تاراز - اقشولاق - اقىرتوبە - قۇلان - مەركە - شۋ - اسپارا - قورداي) قىزىقتى تاريح جانە مادەنيەت ەسكەرتكىشتەرى ورنالاسقان. بەس ەسكەرتكىش (شۋ اۋدانىنداعى اقتوبە قالاشىعى، رىسقۇلوۆ اۋدانىنداعى ورنەك، قۇلان قالاشىقتارى، بايزاق اۋدانىنداعى قوستوبە قالاشىعى جانە جامبىل اۋدانىنداعى اقىرتاس كەشەنى) يۋنەسكو بۇكىل الەمدىك مادەني مۇرالار تىزىمىنە ەنگەن.
ايماقتاعى تۋريزمدى دامىتۋدا «ەجەلگى تاراز» جوباسىنا باسىمدىق بەرىلىپ وتىر. «ەكسپو-2017» كورمەسىن وتكىزۋ اياسىندا شامامەن 20 گەكتار اۋماقتا تارازدىڭ ورتالىق بولىگىندە ورنالاسقان بۇل جوبانى جۇزەگە اسىرۋ جۇمىستارى جۇرگىزىلۋدە.
