ەكسپو-2017: يتاليا مەن وڭتۇستىك كورەيا جاسىل ەنەرگەتيكا سالاسىنداعى تەحنولوگيالارىمەن تاڭعالدىرماق
يتاليانىڭ قاتىسۋى تۋرالى شارتقا «استانا ەكسپو-2017» ۇ ك» ا ق باسقارماسىنىڭ ءتوراعاسى احمەتجان ەسىموۆ جانە «ەكسپو-2017» يتالياندىق سەكسيا كوميسسارى، يتاليا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ستەفانو راۆانيان قول قويدى.
كەزدەسۋ بارىسىندا ۇلتتىق كومپانيا باسشىسى ەكسپو-2017 كورمەسىنە جۇرگىزىلىپ جاتقان دايىندىق تۋرالى، يتاليانىڭ قاتىسۋ شارتى جانە جاڭارتىلاتىن ەنەرگيا كوزدەرىن دامىتۋ سالاسىندا ەكى ەل اراسىنداعى ەكىجاقتى ىنتىماقتاستىقتىڭ قازىرگى جاعدايى مەن بولاشاعى تۋرالى اڭگىمەلەدى.
«كورمە وتكىزۋدەگى يتاليانىڭ تاجىريبەسى ءبىز ءۇشىن وتە ءتيىمدى. ميلاندا وتكەن ەكسپو-2015 تابىستى كورمە بولىپ سانالعان. جاڭارتىلاتىن ەنەرگيا كوزدەرى سالاسىنداعى يتاليا جەتىستىكتەرىن ەسكەرە وتىرىپ، ەكسپو-2017 كورمەسىندە ءسىزدىڭ ەلىڭىز وسى سالاداعى ەڭ جاڭا تەحنولوگيالارمەن تانىستىرادى دەپ ۇمىتتەنەمىز»، - دەپ اتاپ ءوتتى ا. ەسىموۆ.
وسى تۇستا يتاليادا «جاسىل» تەحنولوگيالاردىڭ بەلسەندى قولعا الىنىپ، وتىندى ءارتاراپتاندىرۋ ساياساتىنىڭ جۇرگىزىلىپ جاتقانىن ايتىپ وتكەن ءجون.
يتالياندىق سەكسيا كوميسسارى يتاليادا ەلەكتروەنەرگيا وندىرۋدە 2015 -جىل بويىنشا جاڭارتىلاتىن ەنەرگيا كوزدەرى ۇلەسى %38,4 قۇراعانىن حابارلادى. يتاليا ۇكىمەتى جەل جانە كۇن ەنەرگياسىن دامىتۋ سالاسىن ۇزاق مەرزىمدى دامۋدىڭ باسىمدىعى دەپ بىلەدى. قازىرگى ۋاقىتتا يتاليادا كۇن ەنەرگياسىن وندىرەتىن 150 مىڭنان استام كاسىپورىن جۇمىس ىستەيدى.
«ءبىز ءوزىمىزدىڭ ۇلتتىق پاۆيلونىمىزدى تولتىرۋ ءۇشىن قىزۋ دايىندىق ۇستىندەمىز. ەكسپو-2017 كورمەسىنىڭ الەمدەگى بالامالى ەنەرگيانىڭ دامۋىندا ماڭىزى زور»، - دەدى ستەفانو راۆانيان.
وڭتۇستىك كورەيا دا كورمەدە بالامالى جانە جاڭارتىلاتىن ەنەرگيا كوزدەرى سالاسىندا ءوز جۇمىستارىن كورسەتۋگە دايىن ەكەندەرىن ءبىلدىردى. بۇل تۋرالى ەكسپو-2017-گە قاتىسۋ تۋرالى شارتقا قول قويۋ بارىسىندا كورەيالىق سەكسيا كوميسسارى، كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چو ەنگ چون مالىمدەدى.
«ەكسپو اياسىندا كورەيا 2012 -جىلى يوسۋ قالاسىندا جانە 1993 -جىلى تەدجون قالاسىندا ەكى رەت كورمە وتكىزدى. ەكسپو وتكەننەن كەيىن ول قالالار بارشا كورەيانىڭ عىلىم جانە تەحنولوگيانىڭ دامۋ ورتالىعىنا اينالدى»، - دەدى چو ەنگ چون.
كورەيادا جاڭارتىلاتىن ەنەرگيا كوزدەرى 2008 -جىلدان بەرى دامىپ كەلەدى. بيلىك 2030 -جىلعا قاراي جاڭارتىلاتىن ەنەرگيا ۇلەسىن %11 كوتەرۋ تۋرالى جوسپار قۇرعان. جاڭا جانە جاڭارتىلاتىن ەنەرگيانىڭ %76 دان استامى قوقىس قالدىقتارىنان جاسالعان. مۇنداي ءوندىرىستىڭ شىعىندارى كۇن ەنەرگياسىن وندىرۋدە %10، ال جەل ەنەرگياسىن وندىرۋدە - %66 قۇرايدى.
قوقىستى وڭدەۋ ارقىلى ەنەرگيا الۋ وڭتۇستىك كورەيا ەنەرگەتيكالىق ساياساتىنىڭ جاھاندىق جىلىنۋ سالدارىمەن كۇرەسى بويىنشا ءتيىمدى شارا رەتىندە قاراستىرىلعان.
ايتا كەتەيىك، ارنايى مامانداندىرىلعان حالىقارالىق «استانا ەكسپو-2017» كورمەسىنە قاتىسۋشى مەملەكەتتەر ءتىزىمىنىڭ قۇرىلۋ پروتسەسى ەكى بولىمنەن تۇرادى - قاتىسۋ تۋرالى رەسمي راستاۋ جانە قاتىسۋ تۋرالى شارتقا قول قويۋ.
ازىرگە 94 مەملەكەت ەكسپو-2017 كورمەسىنە قاتىساتىنىن رەسمي تۇردە راستادى، 56 مەملەكەت قاتىسۋ تۋرالى شارتقا قول قويدى.
كورمە استانادا 2017 -جىلدىڭ 10 -ماۋسىم-10 -قىركۇيەك ارالىعىندا وتەدى.
