ۇرىمجىدە ەكسپو-2017 كورمەسىنىڭ تانىستىرىلىمى ءوتتى
شارا اياسىندا استانا ەكسپو-2017 كورمەسىنىڭ تانىستىرىلىمى ءوتتى، دەپ حابارلادى www.24.kz.
كۇللى الەم كوز تىككەن قازاقستانداعى ەحرو تۋرالى قىتايلىق كاسىپكەرلەر مەن تۋريستەر تولىققاندى اقپارات الىپ، كورمەگە قاتىسۋعا قىزىعۋشىلىقتارىن ءبىلدىرىپ جاتىر. سونىمەن قاتار وتاندىق تۋروپەراتورلار تۋريستەرگە ءوز باعدارلامالارىن ۇسىندى. حالىقارالىق تۋريستىك جارمەڭكە كەزەكتى رەت بيىل شىمىلدىعىن ءتۇردى. تۋريزم سالاسىندا تامىرىن تەرەڭگە جىبەرىپ، نارىقتا ورنىققان ءتۇرلى ەل وكىلدەرىنىڭ باسى ءبىر الاڭدا قوسىلدى. ماماندار پىكىر الماسىپ، ەلدەرىنە قوناق تارتۋدىڭ جايىن ايتىستى. ۇرىمشىدەگى ايتۋلى شارادان قازاقستان دا قالىس قالمادى. جارمەڭكەنى ۇيىمداستىرۋشى قىتاي تارابى ەلىمىزدىڭ تۋريستىك باعىتىنا جوعارى باعا بەردى.
«تۋريستەردى قازاقستاننىڭ ەڭ الدىمەن تابيعاتى قىزىقتىرادى. ءبىز قازىردىڭ وزىندە ءسىزدىڭ ەلگە ءتۇرلى تۋر ۇيىمداستىرىپ ءجۇرمىز. ەكىجاقتى بايلانىسىمىز ودان ءارى نىعايا تۇسەدى دەگەن سەنىمدەمىن»، - دەدى ق ح ر شىڭجاڭ اۆتونوميالىق ولكەسى تۋريزم باسقارماسىنىڭ وكىلى ليان يانۆوي.
جارمەڭكە اياسىندا ەكسپو-2017 كورمەسىنىڭ تانىستىرىلىمى ءوتتى. استانادا كەلەر جىلى باستالاتىن حالىقارالىق كورمە تۋرالى ارنايى بەينەروليك كورسەتىلدى. قازاقستان مەن قىتاي ۇلى جىبەك جولىن جاڭعىرتۋ بويىنشا بىرلەسىپ، ءبىرقاتار ءىستى اتقارىپ كەلەدى. ەكسپو-2017 ۇلى جىبەك جولىنداعى ءتۋريزمدى دامىتۋعا تىڭ سەرپىن بەرمەك.
«ۇلتتىق كومپانيانىڭ الدىندا ۇلكەن مىندەتتەر تۇر. ءارتۇرلى ەلدەردەن بارىنشا كوپ تۋريست شاقىرۋىمىز قاجەت. بۇل قادام ارقىلى حالىقارالىق كورمە ۇلكەن ماڭىزعا يە بولادى. باستىسى، قازاقستانداعى تۋريزم دامۋدىڭ جاڭا ساتىسىنا كوتەرىلەدى»، - دەيدى . «استانا ەكسپو-2017» ۇ ك ىلگەرىلەتۋ جانە تۋريزم دەپارتامەنتى ديرەكتورىنىڭ ورىنباسارى روزا اسانبايەۆا.
قازاقستاندىق تۋروپەراتورلار دا جارمەڭكەنىڭ بەل ورتاسىندا ءجۇردى. قىتايلىق ارىپتەستەرىمەن تىعىز بايلانىس ورناتىپ، ۇسىنىس پەن سۇرانىستى تارازىعا سالىپ، ەلىمىزگە تۋريست تارتۋدىڭ جايىن تالقىلادى.
«قىتاي تۋريستەرى كوپ كەلگەنىن قالايمىز. ۇلى جىبەك جولى ارقىلى ەلىمىزدى تانىستىرساق دەگەن ويىمىز بار»، دەپ جوسپارلارىمەن ءبولىستى تۋريستىك كومپانيانىڭ وكىلى مەدەت امانجول.
2017 -جىل قىتايدىڭ قازاقستانداعى تۋريزم جىلى بولىپ بەلگىلەندى. كورشى ەلدىڭ ازاماتتارىنا ۆيزا الۋعا جەڭىلدىك قاراستىراتىن كەلىسىمگە وسىدان 2 جىل بۇرىن قول قويىلعان بولاتىن. سول سەبەپتى، قازاقستاندى كورۋگە قۇلشىنعان قىتايلىق قوناقتاردىڭ قاتارى بەلسەندى تۇردە ارتىپ كەلەدى.
