پولشا «ەكسپو-2017» كورمەسىنە ۇلتتىق ءبولىمنىڭ كوميسسارىن تاعايىندادى
جاڭا تاعايىندالعان ۇلتتىق كوميسسار اندجەي ستەفانسكي قازاقستاننىڭ ەلشىسى ەرىك وتەمبايەۆپەن وتكەن كەزدەسۋىندە «ەكسپو-2017» كورمەسىن وتكىزۋ بويىنشا دايىندىق شارالارىنىڭ بارىسىمەن جانە مەملەكەتتىڭ يندۋستريالدى- يننوۆاتسيالىق دامۋ اياسىنداعى يننوۆاتسيالىق ورتانىڭ دامۋىمەن تانىستىرىلدى. سونداي-اق، قازاقستاندىق ديپلومات تۋريستىك يندۋستريانىڭ دامۋ بويىنشا ىسكە اسىپ كەلەتىن جوبالار جايلى باياندادى.
«الداعى جىلدارى قازاقستان تۋريزمنىڭ ءىرى ەكونوميكالارىنا اينالۋ ىقتيمالدىعى جوعارى، - دەدى ە. وتەمبايەۆ، - سونىمەن بىرگە، قازاقستاندىقتاردىڭ ءداستۇرلى قوناقجايلىعى مەن مەيىرىمدىلىگى، تابيعاتى، تاريحى مەن مادەنيەتىنىڭ بايلىعى جانە ەتنيكالىق سان الۋاندىلىعى وعان وڭتايلى ىقپال ەتەدى».
ءوز كەزەگىندە ا. ستەفانسكيي پولشا الداعى كورمەدە جاڭارمالى ەنەرگەتيكا قورلارى سالاسىنداعى يننوۆاتسيالىق شەشىمدەرىن لايىقتى كورسەتە الاتىنىن اتاپ ءوتىپ، ەكى ەل اراسىنداعى ساۋدا- ەكونوميكالىق بايلانىستاردىڭ ودان ءارى نىعايۋىنا سەنىم ءبىلدىردى.
پولشا تاراپى «جاڭا ەنەرگەتيكا» سالاسىنداعى ءوز تابىستارىن كورسەتۋ بويىنشا تۇجىرىمداماسىن دايىنداۋدى جەدەلدەتۋدى ءارى جۋىق ارادا بارلىق ۇيىمداستىرۋشىلىق ءىس- شارالاردى اياقتاۋدى ماقسات تۇتىپ وتىر. ساراگوسا، شانحاي جانە ميلاندا وتكەن سوڭعى كورمەلەردە پولشانىڭ پاۆيلوندارى ءوز بىرەگەيلىگىمەن ەرەكشەلەنىپ، كورەرمەندەر اراسىندا ۇلكەن تابىسقا يە بولدى.
