وتاندىق اۆتو وندىرۋشىلەر «ەكسپو-2017» كورمەسىندە ۇلتتىق اۆتو برەندتى ۇسىنباق

 الماتى. قازاقپارات - قازاقستاندا ۇلتتىق اۆتو برەند پايدا بولادى. «Allur Group» ديرەكتورلار كەڭەسىنىڭ ءتوراعاسى اندرەي لاۆرەنتيەۆ جۋرناليستەرگە جاڭا جوبا تۋرالى ايتىپ بەردى.

باستىسى ۇلتتىق برەندتى جاساۋعا ءاربىر قازاقستاندىق قاتىسادى. 2016 - جىلدىڭ ساۋىرىندە ۇيىمداستىرۋشىلار جاڭا برەندتىڭ اتاۋى مەن لوگوتيپىنە ۇلتتىق بايقاۋ جاريالاماق.

اندرەي لاۆرەنتيەۆتىڭ ايتۋىنشا، قازىر الەمدىك اۆتو ءوندىرىس ەكولوگيالىق سيپاتتان بولەك، يننوۆاتسيالىق باعىتتا دامىپ بارادى.

«Allur Group» كومپانيالار توبى ۇلتتىق كولىكتى شىعاراردا زاماناۋي ينجەنەرلىك شەشىمدەردى ەسكەرەتىن بولادى. بولاشاقتاعى كولىك - ەلەكتروكار بولۋى مۇمكىن. وسىدان 10 جىل بۇرىن Apple ماشينا شىعارادى دەگەن ءۇش ۇيىقتاساق تۇسىمىزگە كىرگەن جوق. ءتىپتى، Mercedes 2020 -جىلى شاتل- تراكتارىن جىبەرەدى،  Peugeot Citroёn باسشىسى كاروس تاۆاروس جۇمىسىنا جۇرگىزۋشىسىز كولىكپەن بارىپ كەلەدى دەگەنگە سەندىك پە؟ بەلگىلى ساراپشى بيل فوردتىڭ ايتۋىنشا، 15 جىلدان سوڭ جۇرگىزۋشىسىز كولىك ادەتتەگى كورىنىسكە اينالادى. ءبىز دە وسىنداي ۇلكەن قادام جاساۋىمىز كەرەك. نەگە قولعا الماسقا؟ قاجەتتى رەسۋرستار ليتيي مەن گرافەن كوزى قازاقستاندا بار. مۇندا ءتىپتى كومپونەنتتىك بازانى قالىپتاسىرۋعا بولادى»، - دەدى ا. لاۆرەنتيەۆ.

 ونىڭ ايتۋىنشا، قازىر اتالعان جوبانى جۇزەگە اسىرۋ ءۇشىن جۇمىس توبى جاساقتالىپ جاتىر. «Allur Group» ستراتەگيالىق سەرىكتەس رەتىندە قىتاي جانە ەۋروپالىق كومپانيانى تاڭداۋى مۇمكىن.

ساراپشىلاردىڭ زەرتتەۋىنە سۇيەنسەك، قازىرگى تاڭدا اۆتو وندىرىستە ليتي مەتالى گرافەنگە اۋىستىرىلىپ كەلەدى. ول 77 پايىزعا ارزان تۇسەدى. اۆتوپيلوت بويىنشا تەحنولوگيا بىلتىر 14 مىڭ ا ق ش دوللارى بولسا، قازىر 8 مىڭ دوللار تۇرادى.

 Google ماماندارى 2030 - جىلعا قاراي ىشتەن جاناتىن قوزعالتقىشتار وندىرىستەن جويىلادى دەگەن بولجام ايتۋدا. شۆەتسيا 5 جىلدان سوڭ كومىرسۋتەكتەن باس تارتۋعا بەل بۋىپ وتىر. وسى باعىتتا قازاقستان دا ەكولوگيالىق تۇرعىدان تازا، جاڭا ءونىم شىعارۋدى ويلاستىرۋ كەرەك.

«ءبىزدىڭ ماقسات «ەكسپو-2017» كورمەسىندە ءوزىمىزدىڭ كونسەپتسيامىزدى كورسەتۋ. ونىڭ باعاسى، تەحنيكالىق سيپاتتامالارى دا بەلگىلى بولۋى كەرەك. 1,5 جىل از بولعانمەن، بارىنشا تىرىسىپ كورەمىز. جاڭا كولىكتەردىڭ قۇنى شامامەن Hyundai Accent, Kia Solaris قۇنىنىڭ شاماسىندا بولادى»، - دەدى ا. لاۆرەنتيەۆ.

سونداي- اق، «Allur Group» باسشىسى Ssang Yong Nomad كولىگىنىڭ ءوندىرىسى توقتاپ قالمايتىندىعىن جەتكىزدى.

 سوڭعى 4 جىلدا قازاقستاندا وتاندىق اۆتووندىرۋشىلەر 110 مىڭ كولىك، جالپى قۇنى 480,2 ميلليارد تەڭگە بولاتىن كوممەرتسيالىق بولشەكتەر شىعاردى.

 2015 - جىلى اۆتو ءوندىرىس سالاسى ەل قازىناسىنا 55 ميلليارد تەڭگە كولەمىندە سالىق تولەگەن.

بيىلدىڭ وزىندە اتالعان ءارى ارالاس سالادا 1295 جۇمىس ورنى اشىلدى.

اۆتور: گۇلميرا عوسمانالي