استاناعا «ەكسپو-2017» ءنى تاماشالاپ قايتۋعا پاۆلودار وبلىسىنان 100 مىڭ ادام بارادى
بۇل تۋرالى وبلىستىق اكىمدىكتە وتكەن اپپاراتتىق جيىندا ايتىلدى، دەپ حابارلايدى pavlodarnews.kz.
«ەكسپو-2017» كورمەسى كەزىندە استانا قالاسىنا پاۆلودارلىقتار دا بارۋى ءتيىس. ونىڭ ىشىندە الەۋمەتتىك ءالسىز توپتارعا جاتاتىن ازاماتتار دا ەسكەرىلىپ، نازاردان تىس قالماۋى قاجەت. سونىمەن قاتار، ەكسپوعا دايىندىق جۇمىستارىنا بار كۇشىمىزدى سالۋعا ءتيىسپىز. حالىقارالىق كورمەگە دايىندىق جۇمىستارى اياسىندا «سەنتر - ۆوستوك» اۆتوبانىنىڭ ءبىر بولىگى بولىپ تابىلاتىن استانا - پاۆلودار تاس جولى كورمە باستالعانعا دەيىن تاپسىرىلۋى ءتيىس. سونداي-اق، تۋريستىك نىساندارعا اپاراتىن جولدار جيەگىندەگى قىزمەت كورسەتۋ ورىندارى - ءدامحانالار مەن قوناق ۇيلەردى تالاپقا ساي رەتكە كەلتىرۋ كەرەك، مۇراجايلاردا اۋديوگيد، ءۇشتىلدى بيلبوردتاردى ازىرلەۋ سياقتى جۇمىستاردى جەدەلدەتىپ ىسكە اسىرۋ كەرەك»، - دەدى وبلىس اكىمى بولات باقاۋوۆ.
بۇدان باسقا، ايماق باسشىسى كوپ كەشىكپەي قالقامان - باياناۋىل - ۇمىتكەر جول بولىگىن جوندەۋ جۇمىستارى دا باستالۋى ءتيىس ەكەنىن تىلگە تيەك ەتتى. «ەكسپو-2017» اياسىندا كەلۋشىلەرگە نەگىزگى بەس تۋريستىك باعىتتار ايقىندالىپ، بەكىتىلگەن، ولار: ءبىر جانە ەكى كۇندىك «باياناۋىل اڭىزدارى»، شارباقتى اۋدانىنداعى عابدۇلۋاحيت حازىرەت كەسەنەسى باعىتى، لەبياجى اۋدانىنداعى «توتال سەرۆيس» دەمالىس ورنى جانە پاۆلودار قالاسى بويىنشا ەكسكۋرسيا. ايتا كەتەرلىگى، «ەكسپو-2017» حالىقارالىق كورمەسىنە 10- ماۋسىمنان باستاپ ونلاين بيلەتتەر ساتىلا باستاعان.
