ريو-2016: گيۋزەل مانيۋروۆا قازاقستان قورجىنىنا بەسىنشى كۇمىس جۇلدەنى سىيلادى
ريو- دە- جانەيرو. قازاقپارات - برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا بۇگىن ايەلدەر كۇرەسىنەن 75 كەلى سالماقتاعى قازاقستاندىق بالۋان گيۋزەل مانيۋروۆا فينالدا كانادىق بالۋان ەريك ۋيبەدەن ۇتىلىپ، ريو وليمپياداسىنىڭ كۇمىس جۇلدەگەرى اتاندى،
دەپ حابارلايدى ريوداعى قازاقپارات ءتىلشىسى.
ول وسىعان دەيىن، جارتىلاي فينالدا رەسەيدىڭ 2010- 2011 -جىلدارداعى بىرنەشە مارتە چەمپيونى ەكاتەرينا بۋركيناعا قارسى كۇرەستە ناعىز سپورتتىق سەنساتسيا جاساعان ەدى.
ۇپاي جاعىنان ۇتىلا تۇرسا دا، گ. مانيۋرا جەكپە- جەكتى ءوز پايداسىنا تازا جەڭىسپەن اياقتاعان. ايقاستىڭ سوڭىنا دەيىن 8 سەكۋند قالعاندا قازاقستاندىق بالۋان رەسەيلىك قارسىلاسىن شالقاسىنان سۇلاتىپ سالدى.
بۇدان بۇرىن وليمپيادانىڭ العاشقى بەلدەسۋىندە ول ەۋروپا چەمپيونى، ۆەنگرلىك جانەتت نەمەتتى 12.2 ەسەبىمەن ۇتىپ، جەكپە- جەكتى مەرزىمىنەن بۇرىن اياقتاعان بولاتىن.
ال وسىدان شامالى ۋاقىت بۇرىن 63 كەلىگە دەيىنگى سالماقتا ەل نامىسىن قورعاعان ەكاتەرينا لاريونوۆا قولا جۇلدە ءۇشىن تارتىستا ا ق ش سپورتشىسى ەلەنا پيروجكوۆانى جەڭىپ، قازاقستان قورجىنىنا جەتىنشى قولا مەدالدى سالعان ەدى. ال كەشە التىنشى قولا مەدالدى تاعى ءبىر بالۋان قىزىمىز ەلميرا سىزدىقوۆا جەڭىپ العان بولاتىن.
