ريو-2016: قازاق سپورتشىلارى سان ەمەس، ساپاعا قىزمەت ەتەدى

 ريو- دە- جانەيرو. قازاقپارات - بيىلعى جىلدىڭ باستى دوداسى ريو- دە- جانەيرو وليمپياداسىنىڭ بۇگىن ءۇشىنشى كۇنىن ارتقا قالدىرىپ، بۇيىرسا ءتورتىنشى كۇنىنە اياق باسامىز. ازىرگە قورجىندا ءۇش مەدال! ونىڭ ءبىرى - كۇمىس، ەكەۋى - قولا!
None
None

بۇل ازىرگە جەرلەستەرىمىز ءۇشىن جامان كورسەتكىش ەمەس. نەگىزگى مىقتىلار ءالى جارىس جولىن اياقتاعان جوق. سوندىقتان، قالعان 12 كۇندە ءالى التىن دا، كۇمىس تە، قولا دا بولادى دەگەن سەنىمدەمىز. وسى ورايدا تاعى ءبىر مارتە وتكەن تاريحىمىزعا ءۇڭىلىپ، وليمپياداداعى جەتىستىكتەرىمىزدى وقىرماندارىمىزدىڭ ەسىنە سالساق ارتىقتىق ەتپەس دەپ ويلايمىز.

 تاۋەلسىزدىك العان كەزدەن بەرى بەس جازعى وليمپيا ويىندارىنا قاتىستىق. قازىر ريودا التىنشى وليمپياداعا قاتىسىپ جاتىرمىز. ريوعا جالپى 104 سپورتشى كەلدى. بۇل اتلانتا وليمپياداسىنان كەيىنگى ەڭ تومەنگى كورسەتكىش. 1996 - جىلى وليمپياداعا 94 سپورتشى اتتانىپ، 3 التىن، 3 كۇمىس، 4 قولا مەدال جەڭىپ الىپ كەلدى. ال سيدنەي وليمپياداسىنا ەلىمىزدەن ەڭ كوپ سپورتشى قاتىستى. وندا 130 سپورتشى ەل نامىسىن قورعاپ، تاعى دا 3 التىن، 4 كۇمىس مەدالمەن ورالدى. افينى وليمپياداسىنا 114 سپورتشى بارىپ، 1 التىن، 4 كۇمىس، 3 قولا مەدال ولجالاپ قايتتى. بۇل جولى جالپى ەسەپتە 40-ورىنعا تابان تىرەدىك. بەيجىڭدە 129 سپورتشى بارىپ، 2 التىن، 4 كۇمىس، 7 قولا مەدال الىپ قايتتى. ال وسىدان ءتورت جىل بۇرىن لوندون وليمپياداسىنا 115 سپورتشى بارىپ، 7 التىن، 1 كۇمىس، 5 قولا مەدالمەن جالپى ەسەپتە 12-ورىنعا تابان تىرەپ، رەكورد جاساعان ەدى.

وسى مالىمەتتەرگە قاراپ وتىرساق، 94 سپورتشىمەن بارىپ تا، 3 التىن، 3 كۇمىس، 4 قولا مەدالعا قول جەتكىزگەنبىز. ال 114 سپورتشى بارىپ 1 التىن، 4 كۇمىس، 3 قولا مەدال ولجالاپ قايتقان كەزىمىز دە بولدى. سوندىقتان، ماسەلەنىڭ ءبارى ساندا ەمەس، ساپادا ەكەنى انىق. ەندەشە بيىل ريودا دا سپورتشىلارىمىزدىڭ سانىنا ەمەس، ساپاسىنا كوڭىل ءبولۋدى ۇمىتپايىق. نەگىزى قازاقستان ريو- دە- جانەيرو قالاسىندا ءوتىپ جاتقان جازعى وليمپيادا ويىندارىنا ءاۋ باستا 108 جولداماعا يە بولعان ەدى. ءبىراق وليمپيادا قارساڭىندا تەننيسشىلەر ميحايل كۋكۋشكين مەن يۋليا پۋتينتسيەۆانىڭ جاراقات الۋى سەبەپتى ريوداعى ويىندارعا قاتىسا المايتىنى جاريالاندى. ەرەجە بويىنشا، ولاردىڭ جولداماسى باسقا قازاقستاندىق تەننيسشىلەرگە بەرىلمەيدى. بۇدان بولەك، حالىقارالىق اۋىر اتلەتيكا فەدەراتسياسى بيىل دوپينگ جانجالىنا بايلانىستى قازاقستان قۇراماسىن ەكى ليسەنزيادان (1 ەر جانە 1 ايەل) ايىردى. وعان دا شۇكىر دەلىك. رەسەيدىڭ اۋىر اتلەتتەرى ريو وليمپياداسىنا تولىعىمەن قاتىسا المادى.

ەستەرىڭىزگە سالا كەتەيىك، قازاقستان قۇراماسى بوكستان 12 سپورتشى (ون جىگىت پەن ەكى قىز)، ەركىن كۇرەس - 5، گرەك- ريم كۇرەسى - 3، ايەلدەر كۇرەسى - 4، تاس جولداعى ۆەلوجارىس - 2، ۆەلوترەك - 1، كوركەم گيمناستيكا - 1، اكروباتيكا - 1، قايىقتا ەسكەك ەسۋ - 2، بايداركا جانە كانوە - 11، كەدەرگىلەر ارقىلى ەسكەك ەسۋ - 1، دزيۋدو - 6، جەڭىل اتلەتيكا - 26، سۋعا ءجۇزۋ - 3، مانەرلەپ ءجۇزۋ - 2، بەسسايىس - 2، ساداق اتۋ - 2، نىسانا كوزدەۋ - 5، تايەكۆوندو - 3، تەننيس - 2، ۇستەل تەننيسى - 1، اۋىر اتلەتيكا - 8 جانە سەمسەرلەسۋ - 1 ادام قازاقستاننىڭ اتىنان سىنعا تۇسۋدە.

اۆتور: كۇنسۇلتان وتارباي

سوڭعى جاڭالىقتار